Dyrektar «Kinavideaprakatu» Vasil Koktyš raspavioŭ «Salidarnaści» padrabiaznaści demanstracyi apošniaha filma suśvietnaviadomaha dackaha režysiora ŭ Minsku.
U 2009 hodzie Ministerstva kultury ŭklučyła film «Antychryst» znakamitaha dackaha režysiora Łarsa fon Tryjera ŭ śpis karcin, zabaronienych da raspaŭsiudu na terytoryi Biełarusi. U śniežni 2013 adbyłasia suśvietnaja premjera novaha filma Tryjera «Nimfamanka», a napiaredadni hety nie mienš skandalny film byŭ pradstaŭleny na Bierlinskim kinafiestyvali.
— My ŭsie filmy Łarsa fon Tryjera pakazvali, akramia «Antychrysta». Jon byŭ zalimitava žorstkim, tamu jaho ŭ Minsk nie pavieźli. «Nimfamanku» my pakažam u hetym miesiacy, — raspavioŭ «Salidarnaści» dyrektar UP «Kinavideaprakat» Minharvykankama Vasil Koktyš.
Pavodle jaho słoŭ, film budzie demanstravacca ŭ kinateatry «Rakieta» padčas viačernich sieansaŭ:
— Sami razumiejecie, film dla darosłych. Pieršuju častku pakažam 14 lutaha, druhuju praz try tydni.
Zhodna z raskładam, eratyčnuju dramu pakažuć z subtytrami. Pačatak sieansaŭ u 19.00 i 21.10.
Vasil Koktyš raspavioŭ pra šumichu vakoł novaha filma Tryjera:
- Kali daviedaŭsia, što pačałasia chvala zajavaŭ hledačoŭ, hatovych jechać hladzieć «Nimfamanku» u Litvu i Ukrainu, vyrašyŭ, što treba pakazvać jaje tut. Navošta našym ludziam marnavacca na darohu ŭ Litvu? Dy i va Ukrainie ciapier niebiaśpiečna.
Siužet novaha filma aŭtara «Dohvila» i «Miełancholii» ścisła: chałodnaj zimovaj ranicaj Sielihman, niemałady samotny chałaściak, sutykajecca ŭ zavułku z Džo, źbituju i napaŭprytomnuju. Jon, dastaviŭšy žančynu dadomu, raspytvaje jaje pra minułaje i paznaje historyju žyćcia «nimfamanki», jak jana sama siabie nazyvaje.