Isnujučy siaredni košt budaŭnictva doma ŭ vioscy płoščaj 70 kv.m składaje prykładna Vr1,2 młrd — heta prosta rabavańnie viaskoŭcaŭ. Takoje mierkavańnie vykazaŭ 13 lutaha, vystupajučy na pasiadžeńni Mahiloŭskaha abłvykankama, namieśnik premjer-ministra Michaił Rusy.
Heta pamyłka i architektaraŭ, i budaŭnikoŭ, jakija realizujuć takija darahija prajekty, ličyć vice-premjer. Budaŭniki biessaromna robiać usio, kab prajekt byŭ jak maha daražejšy, vybirajučy placoŭki na ŭskrainie vioski, kudy treba ciahnuć inžyniernyja sietki i ŭsie kamunikacyi, imknučysia takim čynam zarabić na viaskoŭcach.
«My pavinny spynić hetu chalavu dla budaŭnikoŭ i pradastavić mahčymaść viaskoŭcam budavać samim, i samim vybirać prajekty, — skazaŭ Michaił Rusy. — Pry hetym košt uzvodzimaha žylla pad kluč nie pavinien pieravyšać Vr500-600 młn. Ciapier abmiarkoŭvajecca prajekt ab vydzialeńni viaskoŭcam Vr1 trłn kredytnych resursaŭ. Heta značyć, žychary sielskaj miascovaści, jakija majuć patrebu ŭ palapšeńni žyllovych umoŭ, atrymajuć mahčymaść uziać kredyt na 40 hadoŭ pad ilhotnuju pracentnuju staŭku dla budaŭnictva doma».
Na dumku vice-premjera, budaŭničyja raboty ŭ abaviazkovym paradku pavinny vykonvacca na tendarnaj asnovie, budzie heta budaŭnictva žyłoha doma abo ŭźviadzieńnie mielijaracyjnych abjektaŭ. Akramia taho, treba pravieści reviziju pabudavanaha ŭžo ŭ adpaviednaści z prahramaj raźvićcia vioski žylla i budavać jaho tolki tam, dzie heta sapraŭdy patrebna, dzie jość patreba ŭ zamacavańni ŭ vioscy śpiecyjalistaŭ, ličyć Michaił Rusy.
