Zapis u roty samaabarony, 23 lutaha, Simfieropal. Fota Rojterz.
Tryvožnyja naviny prychodziać z Kryma. Asabliva niebiaśpiečnaja situacyja skłałasia ŭ Sievastopali. Tam prarasijskija demanstranty abrali svajho «kiraŭnika haradskoj administracyi». Jany sfarmavali miascovuju ŭzbrojenuju milicyju. Na ŭjezdach u horad źjavilisia błakpasty ź bietonnymi barykadami.
Stary mer horada padaŭ u adstaŭku. A novaha pryznačenca Kijeva demanstranty nie puskajuć na pracoŭnaje miesca. Budynak haradskoj administracyi zastajecca zabłakavany pikietčykami.
Nasupierak rašeńniu MUS pra rospusk «Bierkuta», sievastopalski śpiecnaz zastajecca ŭ štacie, zajavili samaabvieščanyja ŭłady horada.
Radykalizacyja situacyi ŭ Sievastopali adbyłasia ŭ vyniku ahulnaha palityčnaha kryzisu va Ukrainie. Kali Lvoŭ i Pałtava stvaryli svaje struktury samaabrony, to čym my horšyja? Strata lehitymnaści Janukovičam pryviała arhumienty i siłam, jakija žadajuć raskołu Ukrainy.
Ruskaja bolšaść u Krymie nie adčuvaje siabie patryjotami Ukrainy. Fota Rojterz.
Situacyja Sievastopala śpiecyfičnaja tym, što horad maje asablivy status i tam mieścicca baza rasijskaha Čarnamorskaha fłota. Janukovič u svoj čas padpisaŭ damovu, zhodna ź jakoj fłot budzie zastavacca tam da 2042 hoda. Faktyčna, horad kantralujecca rasijskimi vojskami. U dvarach budynku štaba fłota i tak zvanaha «Doma Maskvy» stajać rasijskija BTRy.
U ŚMI źjaŭlałasia infarmacyja pra pieramiaščeńnie mabilnych častak u Kubań i pra źjaŭleńnie rasijskich padraździaleńniaŭ u Jałcie.
Centralnyja ŭłady Kijeva nie majuć u Sievastopali dastatkovych vajskovych siłaŭ.
Krym u cełym ujaŭlaje saboj bolš składanuju mazaiku. Dola ruskich u nasielnictvie tam mienšaja (58%). Jašče 25% składajuć ukraincy, jakija pieravažajuć u vioskach, a 12% — krymskija tatary, zhurtavanaja supolnaść, jakaja tradycyjna padtrymlivaje ŭkrainskija nacyjanał-demakratyčnyja partyi. Akramia taho, krymskija elity ciesna źviazanyja z Kijevam ekanamična.
Paradaksalna, ale kazačna pryvabny Krym zastajecca datacyjnym rehijonam. 80% biudžetu Sievastopala i 66% biudžetu Kryma składajucca z datacyj z Kijeva. Akramia taho, Ukraina zdolnaja i pierakryć kranik u pramym sensie hetaha słova. 90% vady Krym, biedny na miascovyja hidraresursy, atrymlivaje z Dniapra praz kanał.
Rasija finansuje ŭ Krymie dziasiatki miascovych prarasijskich arhanizacyj ad «Apłotu» da «Načnych vaŭkoŭ». Taktykaj Rasii była taksama masavaja razdača rasijskich pašpartoŭ. Takim čynam, Maskva atrymlivaje nahodu dla abarony «rasijskich hramadzian». Anałahičnaja taktyka raniej užyvałasia ŭ Abchazii i Asiecii.
Demanstranty ŭ Simfieropali ŭźniali na fłahštoku pierad Viarchoŭnaj Radaj rasijski ściah. Praź dzień jaho źniali. Fota Rojterz.
Siońnia ŭ Simfieropali źbiarecca pazačarhovaja siesija Viarchoŭnaj Rady Kryma. A na płoščy pierad siesijaj čakajucca dva mitynhi. A 12.00 pa biełaruskim časie krymskija tatary sabrali vieča ŭ padtrymku zachavańnia terytaryjalnaj cełasnaści Ukrainy. A 13.00 pačniecca mitynh prarasijskich siłaŭ, jakija vymahajuć ad viarchoŭnaj Rady abviaščeńnia niezaležnaści. Sama siesija raspačniecca a 16.00.
Tatary na svaim mitynhu masava skandavali «Słava Ukrainie! — Hierojam słava!», «Bandu hieť!». (Žyvaja tranślacyja z Kryma — tut.)
Tatary vycisnuli prarasijskich aktyvistaŭ z-pad budynku parłamienta.
Były staršynia Viarchoŭnaj Rady Kryma, a ciapier narodny deputat Ukrainy Leanid Hrač zaściaroh krymčan ad siepartyzmu. Jon napisaŭ u svaim Fejsbuku:
Krym maje status aŭtanomii ŭ miežach Ukrainy. Hetuju terytoryju pieradaŭ u skład Ukrainy ŭ 1954 hodzie Mikita Chruščoŭ u honar 400-hodździa Pierajasłaŭskaj rady. U Krymie daminuje pravasłaŭnaja carkva Maskoŭskaha patryjarchata. Kala 77% žycharoŭ Kryma ličać rasiejskuju movu rodnaj.
U 1995 Kijeŭ admianiŭ kanstytucyju Kryma i adchiliŭ ad ułady prezidenta Miaškova, jaki schilaŭsia da sieparatyzmu. Hetuju apieracyju pravioŭ, darečy, akurat «Bierkut».
Na minułych prezidenckich vybarach Janukovič atrymaŭ u Krymie 78% hałasoŭ (u Sievastopali — 84), Cimašenka — 17 (u Sievastopali — 10).
Faktyčna, dalejšaje raźvićcio padziej zaležyć ad Maskvy. Kali jana šturchnie prarasijskija siły ŭ Sievastopali ci Simfieropali na abviaščeńnie niezaležnaści abo ŭstupleńnie ŭ skład Rasii, u pavietry zapachnie Treciaj suśvietnaj vajnoj. Mižnarodnaja supolnaść naŭrad ci prymie pieradzieł miežaŭ.
Ale mahčymy i inšy scenar — prydniastroŭski. Tady abychodzicca bieź vialikaj vajny, ale zamarožany kanflikt raściahvajecca nadoŭha, kali nie naviečna. Z adnaho boku, heta stvoryć ahmień kanfliktu, z druhoha — paspryjajeje kansalidacyi rešty Ukrainy i zbližeńniu jaje ź Jeŭropaj.
Dahetul rasijskija ŚMI padtrymlivali vysoki hradus rytoryki, ale aficyjnaja palityka Maskvy była bolš strymanaj. Staršynia dumskaha kamiteta pa mižnarodnych spravach Słucki ŭ paniadziełak zajaviŭ u Simfieropali, što Maskva budzie vydavać krymčanam pašparty pa sproščanaj pracedury, ale strymaŭsia ad słovaŭ padtrymki dla sieparatyzmu.
ZŠA zaścierahła Rasiju ad interviencyi ŭ Krymie. «My chočam bačyć stabilnuju, kvitniejučuju, u tym liku ŭ ekanamičnym płanie, Ukrainu. I voś čamu my ŭsie pavinny abjadnacca i pracavać, kab ubačyć, jak my možam dapamahčy padtrymać hetyja namahańni», — adznačyła pradstaŭnica Dziarždepa Džen Psaki.
Jeŭrasajuz raźličvaje, što masiravanaja finansavaja dapamoha Kijevu pryviadzie da palapšeńnia ekanamičnaj situacyi ŭ krainie, i heta stanie najlepšaj zarukaj jaje cełasnaści.
«U nas adzinyja mety pa Ukrainie. Ukraina pavinna być cełasnaj», — zajaviŭ Alaksandr Łukašenka, jak tolki stała viadoma pra ŭcioki Viktara Janukoviča.
