Aficyjnaja Varšava ličyć, što pahadnieńnie 21 lutaha parušyŭ Viktar Janukovič. Pry hetym MZS RF praciahvaje zajaŭlać pra radykał-ekstremistaŭ.
Pazicyju Polščy ahučyŭ kiraŭnik MZS Radasłaŭ Sikorski, paviedamlaje Interfaks-Ukraina.
«Na padstavie toj infarmacyi, jakaja dachodzić da mianie, ja mahu skazać, što spadar Janukovič sam vinavaty, pakolki na praciahu 48 hadzin viartańnie da raniejšaj Kanstytucyi (2004 hoda - red.) musili prahałasavać, što adbyłosia, i padpisać, što nie adbyłosia. Takim čynam, Viktar Janukovič parušyŭ pahadnieńnie», - paviedamiŭ žurnalistam Sikorski, jaki ciapier znachodzicca ź vizitam u Iranie.
Adnačasova MZS Rasii paviedamlaje ab telefonnaj razmovie ministra Łaŭrova ź dziaržsakratarom ZŠA Džonam Kery pa situacyi va Ukrainie.
Padčas hetaj razmovy rasijski ministr zajaviŭ ab nieabchodnaści viartańnia da pahadnieńnia 21 lutaha.
«Z rasijskaha boku była znoŭ akcentavanaja nastojlivaja nieabchodnaść viartańnia situacyi ŭ Kijevie ŭ pravavoje pole, vykanańnie pahadnieńnia ad 21 lutaha, uklučajučy pierš za ŭsio spynieńnie dziejańniaŭ radykał-ekstremistaŭ i prasoŭvańnie nacyjanalnaj zhody na asnovie realnaha ŭliku intaresaŭ usich palityčnych sił i ŭsich rehijonaŭ Ukrainy», - skazana ŭ paviedamleńni MZS RF.
U piatnicu padčas pres -kanfierencyi ŭ Rastovie-na-Donie Viktar Janukovič zajaviŭ, što źjaŭlajecca lehitymnym prezidentam.
Jon zajaviŭ, što jaho « cynična padmanuli».
