Prapahanda ŭ rasijskich ŚMI ŭsio bolš nahadvaje tuju, što była razhornuta ŭ nacysckaj Hiermanii napiaredadni anieksii Sudietaŭ u 1938-m i napadu na Polšču ŭ 1939-m. Tady taksama ahresija ažyćciaŭlałasia pad pretekstam abarony suajčyńnikaŭ i spynieńnia chaosu.
U pryvatnaści, z trybuny Savieta Fiederacyi ŭčora prahučała, a ŭsie ŚMI adzinadušna padchapili infarmacyju pra toje, što z času pačatku kryzisu nibyta 143 tysiačy ŭkraincaŭ šukali paratunku ŭ Rasii. I heta, nibyta, stavić Rasiju pierad nieabchodnaściu abaranicca ad humanitarnaha kryzisu i abaranić «adzinaviercaŭ» na ŭschodzie Ukrainy.
Ničoha padobnaha ŭ realnaści nie adbyvałasia. U Rasiju vyjechaŭ tolki adchileny ad ułady prezident Viktar Janukovič i niekalki dziasiatkaŭ asobaŭ ź jahonaha atačeńnia.
U ŚMI raspaŭsiudžvajecca i inšaja chłuśnia: nibyta ŭzbrojenyja ludzi pranikli na terytoryju Biełharadskaj vobłaści Rasii i navat pierakryli trasu Maskva—Krym. Usio heta vielmi padobna na manu, jakuju raspaŭsiudžvali hitleraŭcy adnosna darohi Bierlin—Kionihśbierh i «napadu palakaŭ» na pamiežnuju radyjostancyju ŭ Hlivicach.
Jak paviedamiŭ hubiernatar Danieckaj vobłaści, učora na mitynhu ŭ abłasnym centry rej viali pryjezdžyja z Rasii. Jany navat niapravilna skandavali proźvišča kiraŭnika vobłaści. A deputat ad Charkava Daniłaŭ raskazaŭ, što biesparadki na hałoŭnaj płoščy horada ŭčora arhanizavali kala 2000 rasijan, što pryjechali aŭtobusami ź Biełharadskaj vobłaści Rasii.
