Ministerstva zamiežnych spraŭ Rasii zajaviła, što pryniataja 11 sakavika parłamientam Kryma dekłaracyja niezaležnaści adpaviadaje normam mižnarodnaha prava.
Pra heta havorycca ŭ paviedamleńni, apublikavanym na sajcie MZS RF u aŭtorak.
U rasijskim źniešniepalityčnym viedamstvie adznačyli, što ŭ dekłaracyi źmiaščajecca mižnarodna-pravavoje abhruntavańnie hetaha kroku z spasyłkami na Statut AAN i inšyja mižnarodnyja dakumienty, a taksama zaklučeńnie Mižnarodnaha Suda AAN ad 22 lipienia 2010 h pa Kosava.
«Rasijskaja Fiederacyja budzie ŭ poŭnaj miery pavažać vyniki svabodnaha volevyjaŭleńnia narodaŭ Kryma ŭ chodzie refierendumu», — havorycca ŭ dakumiencie.
Jak viadoma, «Viarchoŭnaja Rada» Kryma pryniała dekłaracyju ŭ padtrymku niezaležnaści rehijonu ad Ukrainy i maje namier uvajści ŭ skład RF.
Pryniataja dekłaracyja praduhledžvaje abviaščeńnie aŭtanomii niezaležnaj śvieckaj šmatnacyjanalnaj dziaržavaj z respublikanskaj formaj praŭleńnia ŭ vypadku, kali bolšaść udzielnikaŭ refierendumu vykažacca za dałučeńnie da Rasii.
Paśla abviaščeńnia niezaležnaści Krym na pravach niezaležnaj dziaržavy źvierniecca da Rasii z prośbaj pryniać jaho ŭ svoj skład.
U aŭtorak ža «śpikier» Viarchoŭnaj Rady Kryma Uładzimir Kanstancinaŭ zajaviŭ, što «viartańnia Kryma ŭ skład Ukrainy nie budzie».
