Pietycyja z patrabavańniem viarnuć Alasku ŭ skład Rasii, raźmieščanaja na sajcie Biełaha doma čałaviekam ź inicyjałami SV, jaki pradstaviŭsia žycharom horada Ankorydž, za čatyry dni nabrała bolš za 20 tysiač podpisaŭ.
24-y dziaržsakratar ZŠA Uiljam Hienry Śjuard, heta jon kupiŭ Alasku ŭ Rasii ŭ 1867 h. za 7,2 młn dalaraŭ (pa 4,94 dalara za kvadratny kiłamietr), za što, razam z prezidentam Endru Džonsanam, byŭ mocna krytykavany sučaśnikami. Siońnia Alaska ŭ apošni dzień sakavika śviatkuje Dzień Śjuarda.
Jak paviedamlali rasijskija ŚMI, aŭtaram pietycyi źjaŭlajecca vałhahradski aktyvist Siarhiej Varapajeŭ.
Kali dakumient na praciahu miesiaca (heta značyć da 20 krasavika) nabiare bolš za 100 tysiač podpisaŭ, to vašynhtonskaja administracyja, zhodna z zakonam, pavinna budzie abmierkavać jaho i dać adkaz pa sutnaści.
U tekście havorycca, što plamiony, jakija 10-16 tysiač hadoŭ tamu pierasiekli Bierynhaŭ praliŭ i raśsialilisia na Alascy, pryjšli ź Sibiry. Paśla rasiejcy pačali pastupova asvojvać paŭvostraŭ.
Kala hoda tamu na sajcie Biełaha doma była raźmieščana anałahičnaja pietycyja z patrabavańniem vychadu Techasa sa składu ZŠA, jakaja nabrała bolš za 120 tysiač podpisaŭ.
U administracyi adkazali, što kanstytucyja ZŠA, stvoranaja baćkami-zasnavalnikami krainy, nie praduhledžvaje mahčymaści adździaleńnia štataŭ.
