Miljarder i palityk Piatro Parašenka idzie ŭ prezidenty Ukrainy. Pra heta jon zajaviŭ padčas kancerta ŭ Vińnicy.
fota snob.ru
Uviečary jon vyjšaŭ da ludziej i skazaŭ: «Pryjšoŭ čas žyć pa-novamu.
U pieršuju čarhu pavinny pabudavać takuju krainu, dzie buduć hodnyja Uzbrojenyja siły, jakija buduć abaraniać suvierenitet našaj dziaržavy. Musim pabudavać novyja pravaachoŭnyja orhany, jakija buduć abaraniać mienavita pravy i biaśpieku kožnaha čałavieka. Stvaryć taki inviestycyjny klimat, kab pryjšli ludzi, jakija viedajuć i ŭmiejuć stvarać novyja pracoŭnyja miescy i płacić padatki. Dać šaniec moładzi, jakaja budzie hanarycca tym, što žyvie va Ukrainie.
Žyć pa-novamu — heta być bahatym, pracavitym i volnym u niezaležnaj dziaržavie. Tamu ja pryniaŭ rašeńnie bałatavacca na pasadu prezidenta».
Parašenka paprasiŭ u vińničan padtrymki, na što ludzi pačali skandavać «Parašenka!».
Jon dadaŭ: «Ja nie zdradžu».
Paśla hetaha jon prapanavaŭ uspomnić Niabiesnuju sotniu pad pieśniu «Płyvie kača».
Skončyŭ svoj vystup himnam Ukrainy, jaki praśpiavali ŭsie prysutnyja.
Za niekalki chvilin da vystupu Parašenki, śpiavačka Džama praśpiavała niekalkimi movami — rasijskaj, ukrainskaj i tureckaj.
Paśla słoŭ «Krym — heta Ukraina» ludzi vypuścili ŭ pavietra žoŭtyja i błakitnyja šaryki.
Piatro Parašenka ŭ 1990-ch stvaryŭ kandytarskuju impieryju «Roshen», u 2007—2012 hh. staršynia Rady Nacbanka Ukrainy, u 2009-2010 hh. — ministr zamiežnych spraŭ, byŭ ministram ekanamičnaha raźvićcia Ukrainy. Adzin ź lidaraŭ Aranžavaj revalucyi, a taksama idejny natchnialnik Jeŭramajdanu 2013-2014 hh.
Pavodle apošnich apytańniaŭ, Parašenka maje najbolšy rejtynh siarod ukrainskich palitykaŭ.
Daterminovyja prezidenckija vybary pryznačanyja va Ukrainie na 25 maja.
Pra svoj udzieł zajavili Julija Cimašenka, rehijanały Siarhiej Cihipka, Michaił Dobkin, Aleh Caroŭ, a taksama Renat Kuźmin, staršynia ŭsieŭkrainskaha jaŭrejskaha abjadańnia Vadzim Rabinovič dy inš.
Miarkujecca, što asnoŭnaja baraćba razhorniecca pamiž Cimašenkaj i Parašenkam. Adnak u vypadku kali pad rasijskim ekanamičnym i vajennym ciskam situacyja ŭ krainie rezka pahoršaje, to mohuć vyraści šancy kandydataŭ z uschodu krainu kštałtu Cihipki.
