Biełaruś u luboj situacyi budzie z Rasiejaj, zajaviŭ Alaksandr Łukašenka siońnia na sustrečy z namieśnikam staršyni ŭrada Rasijskaj Fiederacyi, staršynioj Vajenna-pramysłovaj kamisii pry ŭradzie RF Dźmitryj Rahozin, paviedamlaje BiełTA
«Mnie vielmi pryjemna bačyć vas u Minsku, jak blizkaha i rodnaha čałavieka i pa ideałohii, i naohuł pa dušy, — skazaŭ Łukašenka, źviartajučysia da Rahozina. — Pa-druhoje, u nas šerah dziaržaŭnych pytańniaŭ. Napeŭna, jość niejkija prablemy ŭ hetym płanie.
Padvodziačy rysu jak vynik, možna skazać, što taja situacyja, jakaja składvajecca vakoł nas, budziem ščyryja, nie vielmi nam padabajecca».
Kiraŭnik dziaržavy praciahnuŭ: «U hetym płanie my dakładna i peŭna zajavili pra toje, što nam treba być bližej adzin z adnym. I ŭ luboj situacyi my budziem z Rasijaj».
«Treba spynić usialakija insinuacyi na hetuju temu», — zaŭvažyŭ Łukašenka.
Alaksandr Łukašenka pravioŭ paralel, kali amierykancy, da prykładu, «razbambili Irak i paśla hetaj bambiožki ŭsio razumieli, što heta niapravilna, niespraviadliva, ale jany adnaznačna stali na bok sajuźnikaŭ».
«A čamu my pavinny zajmać inšuju pazicyju, kali ŭ nas sajuźnik Rasija, i taki adziny sajuźnik, voś i ŭsia łohika», - skazaŭ Alaksandr Łukašenka.
Pavodle jaho słoŭ, jość i inšyja faktary. «Tamu my dziejničajem zychodziačy ź situacyi, zychodziačy sa stanovišča, u intaresach našaj dziaržavy i ŭ intaresach našaha adzinaha stratehičnaha ŭ takim rodzie sajuźnika», — padkreśliŭ jon.
«U suviazi z hetym, my taksama heta nie ŭtojvajem, my vielmi intensiŭna raźvivajem supracoŭnictva ŭ vajenna-techničnaj śfiery, — praciahnuŭ kiraŭnik dziaržavy. — My madernizujem svoj VPK, sprabujem vyrabić novuju pradukcyju na našych pradpryjemstvach.
Ale pakolki heta niekalki dziasiatkaŭ vysokatechnałahičnych pradpryjemstvaŭ, my razumiejem, što, kali my budziem ciesna źviazany z rasijskim VPK, rasijskimi pradpryjemstvami, my bolš efiektyŭna praviadziem hetuju madernizacyju». I samaje hałoŭnaje, jak ličyć Alaksandr Łukašenka, «hetaja pradukcyja budzie zapatrabavana ŭ siłu svajoj śpiecyfiki, pierš za ŭsio, u našaj Rasii». «My heta dobra razumiejem», — skazaŭ jon.
Rahozin, jaki źjaŭlajecca staršynioj vajenna-pramysłovaj kamisii pry ŭradzie RF, u svaim mikrabłohu ŭ «Tvitery» ranicaj 1 krasavika napisaŭ: «Siońnia ranicaj na čale delehacyi Vajenna-pramysłovaj kamisii vylataju ŭ Minsk na pieramovy pa padklučeńni abaronna-pramysłovaha kompleksu Biełarusi da našaj pracy», dadaje BiełaPAN.