Kiraŭniki ŭkrainskich siłavych viedamstvaŭ zrabili spravazdaču pa rasśledavańni masavych zabojstvaŭ na Majdanie 18—20 lutaha.
lenta.ru
U pryvatnaści, rasśledavańniem było ŭstanoŭlena, što dziejańni «citušak», jakija ažyćciaŭlali dziejańni suprać mirnych pratestoŭcaŭ u Kijevie, kaardynavaŭ kiraŭnik miedyja-chołdynhu «Kantakt» Viktar Zubrycki, źviazany z eks-ministram unutranych spraŭ Vitalom Zacharčankam. Pra heta zajaviŭ ministr unutranych spraŭ Ukrainy Arsien Avakaŭ.
«Zubrycki, pa sutnaści, ažyćciaŭlaŭ suviaź i ŭsiu kaardynacyju dziejańniaŭ «citušak», adpaviednych bandaŭ, što asistavali orhanam unutranych spraŭ u represiŭnych dziejańniach suprać pratestocaŭ u toj čas», — paviedamiŭ ministr.
Taksama, pa jaho źviestkach, 17 čałaviek byli zabityja na Instytuckaj u čas supraćstajańnia z pravaachoŭnikami.
Jon dadaŭ, što na Instytuckaj z boku Kastryčnickaha pałaca pracavała śpiecrota «Bierkuta» z žoŭtymi paviazkami na rukavach pad kiraŭnictvam majora Dźmitryja Sadoŭnika. Usie asoby udzielnikaŭ apieracyi ŭstanoŭleny.
«Pieršaja častka rasśledavańnia — heta rasśledavańnie zabojstvaŭ, jakija adbylisia ad snajpieraŭ, druhoje — heta zabojstva ad pramoj stralby… chutčej za ŭsio ad ruk vartavych paradku, treciaje — heta hibiel ad ruk «citušak» i čaćviortaje — abstaviny, pry jakich zahinuli pravaachoŭniki», — skazaŭ ministr.
Kiraŭnik SBU Valancin Nalivajčanka zajaviŭ, što ŭ płanavańni apieracyi na Majdanie prymali ŭdzieł 26 supracoŭnikaŭ FSB Rasii.
Pavodle jaho słoŭ, hetyja asoby prybyli va Ukrainu ŭ siaredzinie studzienia, i jość infarmacyja, što hrupy byli raźmieščany pad Kijevam na terytoryi vučebnaha centra SBU. Bolš za toje, adznačyŭ Nalivajčanka, tudy byli praviedzieny linii uradavaj suviazi, i tahačasny staršynia SBU Alaksandr Jakimienka asabista pryjazdžaŭ da ich na dakład.
Kiraŭnik SBU taksama paviedamiŭ, što 108 uzbrojenych bajcoŭ śpiecpadraździaleńnia «Alfa» 18 lutaha mieli namier šturmavać Dom prafsajuzaŭ na Majdanie Niezaležnaści u Kijevie, dzie raźmiaščaŭsia štab pratestoŭcaŭ.
Jon adznačyŭ, što bajcy śpiecpadraździaleńnia, uzbrojenyja aŭtamatami Kałašnikava i snajpierskimi vintoŭkami niamieckaj vytvorčaści, vysadzilisia na dach Doma prafsajuzaŭ, ale ich spyniła ŭzharańnie budynka, i jany vymušanyja byli adyści tym ža šlacham, jakim pryjšli.
Pa słovach Nalivajčanki, na nastupny dzień u budynkach pa vulicy Kaścielnaj, vulicy Chryščacik, 7/11, pracavali snajpiery — 7 aficeraŭ « Alfy». Jany praciahvali dziejničać i 20 lutaha, dadatkova vystaviŭšy snajpierskija pasty ŭ budynku Administracyi prezidenta.
Jak adznačyŭ Nalivajčanka, zaraz prachodziać dopyty kiraŭnictva «Alfy», asobnych bajcoŭ śpiecpadraździaleńnia, jany supracoŭničajuć sa śledstvam.
Inšaja častka bajcoŭ «Alfy» razam z supracoŭnikami «Bierkuta» źbiehli ŭ Krym, i ciapier važna viarnuć ich i dapytać.
Nahadajem, raniej paviedamlałasia, što zatrymanyja 12 bajcoŭ «čornaj roty» «Bierkuta», jak miarkujecca, jakija stralali pa mitynhoŭcach z ahniastrelnaj zbroi, uklučajučy ich kamandzira.
