Bresckija abanienty apierataraŭ sotavaj suviazi atrymali siońnia ranicaj kala 1000 sms-paviedamleńniaŭ ad telefonnych machlaroŭ, paviedamili ŭ adździaleńni infarmacyi i hramadskich suviaziaŭ Bresckaha abłvykankama. Masavaja sms-rassyłka była nastupnaha źmiestu: «Dobry dzień, pazvanicie mnie terminova 0023221340696».
Jak akazałasia, na hety zaklik adhuknulisia mnohija karystalniki mabilnych telefonaŭ. Jakaja kolkaść hramadzian paciarpieła ad machlaroŭ, zaraz ŭstaloŭvaje milicyja.
Načalnik adździeła pa raskryćci złačynstvaŭ u śfiery vysokich technałohij UUS Andrej Hałodka adznačyŭ, što schiema ašukancaŭ prostaja.
Pakazany ŭ sms-paviedamleńni numar telefona płatny i zarehistravany ŭ Respublicy Śjera-Leone. Žychary Bresckaj vobłaści, jakija patelefanavali siońnia ranicaj u hetuju dziaržavu ŭ Zachodniaj Afrycy, praspansaravali nieviadomaha afrykanca na kruhłuju sumu.
Supracoŭniki milicyi zaklikajuć karystalnikaŭ mabilnych telefonaŭ być pilnymi i nahadvajuć, što pieršyja ličby ŭ numarach u Biełarusi pačynajucca z «375». Va ŭsich astatnich vypadkach havorka idzie pra inšyja dziaržavy.
A adnamu z abanientaŭ mabilnaj suviazi ź Minsku pryjšła anałahičnaja sms-ka, ale na biełaruskaj movie.
Paviedamleńnie, jakoje vy bačycie na fota, pryjšło da žycharki Minsku 1 krasavika. Jana zacikaviłasia biełaruskamoŭnaj sms-kaj i patelefanavała. Jak raspaviała paciarpiełaja, joj adkazaŭ mužčynski hołas, jaki pačaŭ raspaviadać, što dziaŭčyna vyjhrała ŭ łaterei niejki pryz. Zrazumieŭšy, što heta ašukanstva, jana skončyła razmovu, paśla čaho pabačyła, što ź jaje rachunka źnikła vialikaja suma hrošaj.
