Centralnaja vybarčaja kamisija Ukrainy admoviła ŭ rehistracyi kandydatam u prezidenty Dartu Viejderu.
U rašeńni CVK adznačajecca, što Dartu Viejderu admoŭlena ŭ rehistracyi na padstavie pradstaŭleńnia niepraŭdzivych źviestak pra miesca i čas praviadzieńnia źjezdu Internet-partyi Ukrainy.
Dart Viejder padaŭ dakumienty, dzie ŭkazvałasia, što źjezd prajšoŭ 25 sakavika ŭ vioscy Mikałajeŭka Adeskaj vobłaści, adnak vykanaŭčy kamitet hetaha siała padaŭ CVK daviedku, što pa ŭkazanym adrasie, dzie pavinien byŭ prachodzić źjezd, raźmieščany žyły dom, i nijakija masavyja mierapryjemstvy ŭ im nie pravodzilisia 25 sakavika.
U kamisii adznačyli, što ŚMI paviedamlali pra źjezd Internet-partyi Ukrainy ŭ Kijevie 29 sakavika, adnak dakumienty nakont hetaha źjezda ŭ CVK ad kandydata nie byli padadzienyja.
Pradstaŭlajučy prajekt rašeńnia pa Dartu Viejderu, člen CVK Ihar Žydzienka, adznačyŭ, što sprobu rehistracyi jaho kandydatam u prezidenty možna było b razhladać jak žart, «kali b chtości nie zapłaciŭ za heta 2,5 młn hrn» (kala 250 tys. dalaraŭ).
Člen kamisii vykazaŭ zdahadku, što takaja akcyja rabiłasia z metaj dyskredytacyi vybarčaj kampanii.
Pry hetym Žydzienka vykazaŭ mierkavańnie, što heta «brudnaja vybarčaja technałohija», nakiravanaja na dyskredytacyju nie tolki vybaraŭ, ale i krainy ŭ cełym. Jon źviarnuŭ uvahu na toje, što hetaj piersonie vielmi šmat uvahi nadajuć rasijskija ŚMI.
Jon taksama nazvaŭ sapraŭdnaje imia Darta Viejdera — Viktar Šaŭčenka, jakoje jon źmianiŭ 19 sakavika ŭ Abałonskim rajadździele milicyi Kijeva.
Žydzienka paviedamiŭ, što nie adnosicca Dart Viejder i da kampanii, jakaja ŭniesła zakład: TAA «Ciomny bok siły» zarehistravanaj tolki 24 sakavika 2014 h.
Taksama ŭstanoŭlena, što kandydat nie ŭłasnaručna zapaŭniaŭ dakumienty, akramia hrafy « Asabisty podpis».
U pazačarhovych vybarach prezidenta Ukrainy 25 maja 2014 h. voźmuć udzieł 23 kandydaty.
Siarod zarehistravanych — Volha Bahamolec — hałoŭny doktar Majdanu; člen Partyi rehijonaŭ Juryj Bojka; nardep, były ministr abarony Anatol Hrycenka; Michaił Dobkin — eks-staršynia Charkaŭskaj abłdziaržadministracyi; były ministr sacyjalnaj palityki Natalla Karaleŭskaja, były namieśnik hienprakurora Renat Kuźmin; niezaležny deputat, kiraŭnik Radykalnaj partyi Aleh Laško; pradprymalnik Piatro Parašenka; pradprymalnik, kiraŭnik Usiejaŭrejskaha kanhresa Vadzim Rabinovič, kiraŭnik kampartyi Piatro Simanienka; lidar partyi «Svaboda» Aleh Ciahnibok, členy Partyi rehijonaŭ Aleh Caroŭ, Siarhiej Cihipka, eks-premjer i eks-palitviazień Julija Cimašenka, lidar «Pravaha siektara» Dźmitryj Jaraš.