 Artur Fińkievič |
U aŭtorak uviečary samamu maładomu palitviaźniu Biełarusi Arturu Fińkieviču było aficyjna pradjaŭlenaje novaje abvinavačvańnie. Śledčy Alaksandr Leskaviec u prysutnaści advakatki abvieściŭ, što śledčyja dziejańni skončanyja i majucca dokazy viny. Maładafrontaŭca abvinavačvajuć u parušeńni art. 415 KK RB «Admova ad adbyvańnia pakarańnia ŭ vyhladzie abmiežavańnia voli».
Kryminalnaja sprava była ŭzbudžanaja paśla taho, jak junak atrymaŭ ad kiraŭnictva mahiloŭskaj śpieckamiendatury čaćviortaje papiaredžańnie za parušeńnie režymu. Padčas papiaredniaha śledstva Artur Fińkievič častkova pryznaŭ svaju vinu.
Aznajamleńnie z materyjałami spravy raspačniecca praz tydzień. Sud, jak miarkujecca, adbudziecca praź miesiac. Zhodna z normami Kryminalnaha kodeksu palitviaźniu pahražaje pazbaŭleńnie voli terminam ad 6 miesiacaŭ da 3 hadoŭ z adbyvańniem pakarańnia ŭ kałonii ahulnaha režymu.
Nahadajem, viasnoj 2006 hoda Artura Fińkieviča pakarali dvuma hadami «chimii» za palityčnyja hrafici. Termin jon adbyvaje ŭ Mahiloŭskaj vypraŭlenčaj ustanovie adkrytaha typu №43. Vyjści na volu chłopiec musiŭ užo praź miesiac.
Fota Julii Daraškievič
