U Miensku zatrymanyja ŭdzielniki śviatkavańnia Chełoŭinu abnoŭlena, dadalisia fatazdymki13
“U tym hodzie ŭsie apranulisia, jak zombi, i nikoha nia ŭziali. A ŭ hetym hodzie apranulisia mumijami — i ŭsich aryštavali. Zombi być spakajniej”.
Moładź sabrałasia a 19.00 u CUMie la adździełu kanctavaraŭ, adkul i musiŭ pačacca fłeš-mob. Akcyja nia mieła palityčnaj afarboŭki. Jaje ŭdzielniki planavali apranucca ŭ śviatočnyja stroi i pavinšavać mienčukoŭ sa śviatam, jak jany rabili heta ŭ minułyja hady. Stroi byli adpaviednyja charaktaru śviata: moładź planavała apranucca mumijami, dziela čaho panabirała z saboju bintoŭ.
Chvilinaŭ praz dvaccać, kali śviatkavalniki, čałaviek 15—20, pačali intensiŭna abmotvać siabie bintami i nanosić na ich “kryvavyja” plamy, u CUM zajšli milicyjanty. Udzielnikam fłeš-mobu było paviedamlena, što jany “nahadvajuć złačyncaŭ”. Milicyja zatrymała piać čałaviek: Jurasia Šalina, Andreja Kima, Valancina Sakałoŭskaha, Taćcianu Łaškarovu. I ź imi karespandenta “NN” — za toje, što “rabiŭ fotazdymki milicyjantaŭ biez dazvołu”.
Zatrymanych advieźli ŭ Saviecki RAUS (vuł.Jakuba Kołasa). Na udzielnikaŭ maskaradu skłali pratakoły za drobnaje chulihanstva: “u CUMie razmatvali binty, pieramazanyja čyrvonaj farbaj, i raskładali ich na pryłavak, na zaŭvahi pradaŭcoŭ nie reahavali”. Zatrymanyja kateharyčna asprečvali pratakoły. Maŭlaŭ, padčas fłeš-mobu jany naadvarot, abmotvalisia bintami i malavali na sabie hrym. Pavodle ich słovaŭ, pradaŭcy CUMu dali im dazvoł padrychtavacca da maskaradu. Jany źbirajucca pisać skarhu na imia načalnika RAUSu Siarhieja Biaśśmiertnaha na niepravamiernyja dziejańni milicyi.
Ŭ RAUSie zatrymanyja siadzieli ŭ maskaradnych kaściumach mumijaŭ, i abmiarkoŭvali plany na śviatočnuju noč. Milicyjanty, jakija zachodzili ŭ adździaleńnie, śmiajalisia i vadzili adzin adnaho pahladzieć na “monstraŭ”.
Zatrymanyja chłopcy žartavali: “U tym hodzie ŭsie apranulisia, jak zombi, i nikoha nia ŭziali. A ŭ hetym hodzie apranulisia mumijami — i ŭsich aryštavali. Na nastupny Chełoŭin lepš iznoŭku być zombi, tak spakajniej”.
Praź niekatory čas žurnalista adpuścili. Zatrymanyja ž “monstry”, vidać, tak spadabalisia milicyjantam, što ich pakinuli ŭ RAUSie na noč. Zaŭtra administracyjnaja sprava budzie razhledžanaja ŭ sudzie Savieckaha rajonu.
