Darahija siostry i braty!
U hety strašny momant my z bolem serca źviartajemsia da vas.
Kiroŭny ŭ Rasiei režym pierajšoŭ apošniuju maralnuju miažu i biez abviaščeńnia vajny pačaŭ vajennyja dziejańni va Ukrainie. Na pačatku sakavika rasiejskaja armija akupavała Krym, a ciapier sprabuje zachapić paŭdniovy ŭschod vašaj krainy.
Pry hetym śpiecpadraździaleńni rasiejskaj armii, što haniebna dla vajskoŭcaŭ luboj krainy, chavajuć svaju nacyjanalnuju prynaležnaść i svaje tvary i dziejničajuć u jakaści «zialonych čałaviečkaŭ». Heta hańba dla Rasiei, hańba dla našaj armii. Rasiejskaja armija nikoli nie hańbiła siabie, prykryvajučysia mirnymi žycharami. Rasiejski vajskoviec tak nie zrabiŭ by i ciapier, ale režym šturchnuŭ jaho na złačynstva suprać brata i suprać ułasnaha honaru.
Dla akupacyi ukrainskaj ziamli, adrynańnia jaje častki rasiejskaja ŭłada vykarystoŭvaje spres chłuślivyja łozunhi ab šmathadovym žorstkim pryhniocie rasiejskamoŭnych hramadzian Ukrainy kijeŭskimi ŭładami, jaki nibyta mieŭ miesca, i pra toje, što sioleta ŭ lutym dziaržaŭnuju ŭładu va Ukrainie zachapili fašysty i banderaŭcy. My vydatna razumiejem, što Janukovič, jaki kiravaŭ Ukrainaj ŭsie apošnija hady, sam, pachodziačy z uschodu Ukrainy, nikoli nie staŭ by pryhniatać suplamiennych jamu žycharoŭ Danbasa, Charkava i Kryma bolš, čym ukraincaŭ zachodniaj častki vašaj krainy. Jon i jahonyja papiaredniki pryhniatali ŭsich hramadzian, rabujučy ich i pieratvarajučy najbahaciejšuju patencyjna krainu Jeŭropy ŭ krainu žabrakoŭ i biaspraŭnych ludziej, niaredka zmušanych šukać kavałak chleba za miažoj. My vydatna razumiejem taksama, što ciapierašniaja ŭłada Ukrainy, pryznanaja amal usioj suśvietnaj supolnaściu, nie maje ničoha supolnaha ni z fašyzmam, ni z nacyzmam. Hetaja ŭłada, jakaja raspačała kiravańnie krainaj u pastajannym dyjałohu z hramadzianami, imkniecca zaćvierdzić va Ukrainie demakratyčnuju dziaržaŭnaść.
My vyrazna ŭśviedamlajem, što Ukraina – adna z krainaŭ, jakija ŭtvarylisia paśla raspadu SSSR – nie zachoplivała ni piadzi ziamli za miežami miežaŭ, paćvierdžanych mižnarodnymi i miždziaržaŭnymi damovami, miežaŭ, ŭspadkavanych ad SSSR. Ciapierašniaja Rasiejskaja Fiederacyja ni ŭ małoj stupieni nie źjaŭlajecca adzinym spadčyńnikam našaj byłoj ahulnaj krainy Rasiei. Ziamla Sievastopala, Kryma, Danbasa, roŭna jak i ziamla luboj inšaj častki histaryčnaj Rasiei, palitaja potam i kryvioju ŭsich narodaŭ našaj byłoj ahulnaj radzimy, bo ŭsie jaje abaraniali, i ŭsie na joj pracavali, radavalisia i pakutavali. Słovy, skazanyja sp. Pucinym pra ŭźjadnańnie Krymu z Rasiejaj, źjaŭlajucca nie čym inšym, jak iłžyvaj ahitkaj. Hetak ža možna abviaścić pra ŭźjadnańnie Kazachstana i Kirhizii z Rasiejaj, bo da 1936 hoda jany byli častkaj RSFSR, dy i Finlandyi i Polščy, bo da 1917 hoda jany źjaŭlalisia častkaj rasiejskaj dziaržavy.
My ličym nieparušnym Pahadnieńnie ab stvareńni SND ad 8 śniežnia 1991 hoda, amal adzinahałosna ratyfikavanaje rasiejskim parłamientam, piaty artykuł jakoha abviaščaje, što «Vysokija Dahavornyja Baki pryznajuć i pavažajuć terytaryjalnuju cełasnaść adno adnaho i niedatykalnaść isnych miežaŭ u ramkach Sadružnaści». Hety pryncyp byŭ paćvierdžany ŭ artykule druhim «Damovy ab družbie i supracoŭnictvie pamiž Rasiejskaj Fiederacyjaj i Ukrainaj» ad 31 maja 1997 hoda. Pryncyp hety adpaviadaje i pryncypam (treciamu i čaćviortamu) Chielsinskaha zaklučnaha akta ABSIE.
Siońnia, padstupna parušajučy ŭsie hetyja i mnostva inšych mižnarodnych damovaŭ, plažačy svoj ułasny podpis pad imi, Rasiejskaja Fiederacyja, a dakładniej, režym, što zachapiŭ u joj uładu, ździekliva ažyćciaŭlaje ahresiju suprać vas, ukraincaŭ, samaha blizkaha i bratniaha nam naroda, vysakamierna patrabuje ad vas pryniaćcia tych abo inšych formaŭ dziaržaŭnaha ładu, pierahladu vami vašaj Kanstytucyi, vašych zakonaŭ. Ciapierašni režym zabyvaje, što jahonaja ŭłada navat nad Rasiejaj vałodaje vielmi sumnieŭnaj lehitymnaściu praz adsutnaść u ciapierašniaj Rasiei svabodnych i praŭdzivych vybaraŭ usich uzroŭniaŭ, uklučajučy prezidencki, i šmatrazovyja falsifikacyi. Pahatoŭ jon nie maje nijakaha prava dyktavać svaju volu inšaj suvierennaj dziaržavie.
Nam ahidnyja hetyja dziejańni našaj ułady, my pakutujem ad toj hańby, jakuju jany ŭčyniajuć našaj radzimie pierad abliččam ŭsioj suśvietnaj supolnaści. My ŭśviedamlajem, što stanovimsia krainaj-izhojem, z usimi ekanamičnymi i palityčnymi nastupstvami, jakija z hetaha niaščasnaha stanovišča vynikajuć.
I tamu – z asablivaj ščyraściu! – my chočam abviaścić vam, darahija ŭkrainskija siostry i braty: adstojvajučy svabodu vašu, cełasnaść vašaj krainy, vy adstojvajecie i cełasnaść našaj krainy Rasiei, i svabodu našaha naroda.
My z vami ŭ vašaj spraviadlivaj baraćbie!
Ludmiła Alaksiejeva
Andrej Zubaŭ
Michaił Kaśjanaŭ
Hieorhij Sataraŭ
Lilija Šaŭcova
