Dom da pryjezdu Łukašenki
Vyjezd Alaksandra Łukašenki ŭ rehijony — zaŭsiodny stres dla miascovych čynoŭnikaŭ. Padrychtoŭka terytoryi da vizitu kiraŭnika dziaržavy pačynajecca za niekalki tydniaŭ. Śpiecyjalnyja kamisii pa niekalki razoŭ na dzień abychodziać miescy, kudy moža kinuć pozirk Alaksandr Łukašenka: jak by čaho nie vyjšła. Bo kali toj adchilicca ad zapłanavanaha maršrutu — čakaj biady. Barysaŭskija i słuckija čynoŭniki nie daduć zmanić.
14 krasavika Alaksandr Łukašenka ŭračysta adkryvaŭ u Minsku čatyrochzorkavy hatel «Reniesans», jaki pabudavaŭ «miljarder Miša» — ułaśnik «Rasnafty» Michaił Huceryjeŭ.
Pačatak praśpiekta Dziaržynskaha — łasy kavałak stalicy. Da vakzała i płoščy Niezaležnaści adsiul 1—2 km, tamu ofisnyja i žyłyja damy tut rastuć, jak hryby paśla daždžu.
Niahledziačy na pryjezd kiraŭnika dziaržavy, hatel byŭ usio jašče nie dabudavany. Na apošich pavierchach, kudy nie paviali Łukašenku, budaŭniki praciahvali pracavać i ŭ nastupnyja dni. Realnaje adkryćcio hatela adbudziecca tolki ŭ pačatku maja.
Ale samaje cikavaje adbyvałasia praz darohu ad «Reniesansa». Nasuprać hatela — parkavaja zona, bolš padobnaja na pustku, pasiarod jakoj zastalisia dva budynki.
Adzin ź ich — stary dvuchpaviarchovik, pakoi jakoha padzielenyja pamiž drobnymi arhanizacyjami. Hladzicca jon niavažna, ale, u adroźnieńnie ad susiedniaha budynka, chacia b prykryty drevami.
A voś «susied»… U rejestry Nacyjanalnaha kadastravaha ahienctva chatka pa adrasie Rozy Luksiemburh, 89a apisanaja nadzvyčaj udała: «budynak niavyznačaha pryznačeńnia». Składajecca jon z troch siencaŭ, troch chlavoŭ dy tualeta na dvary.
Za niekalki dzion da pryjezdu Łukašenki budynak raptoŭna źmianiŭ vyhlad.
Dźvie ściany pieratvarylisia ŭ… jarki zialony les, jašče adna «stała» cahlanaj i zajmieła akuratnyja akiency. Namalavanyja. Šyrmy hladziacca nienaturalna, ale, pa mierkavańni čynoŭnikaŭ, bolš vyjhryšna, čym realnaść.
Pavodle dakumientaŭ, u chatcy zasiadaje zahadkavaje STAA «Liŭbieł». Letam 2010 hoda hetaja nikomu nieviadomaja kampanija atrymała ad Minharvykankama ŭčastak pad budaŭnictva doma. Haradskija ŭłady vyrašyli navat nie pravodzić farmalny aŭkcyjon z hetaj nahody.
20-paviarchovik musiŭ paŭstać na toj samaj pustcy nasuprać hatela «Reniesans».
Kali Kamitet dziaržkantrolu daviedaŭsia, što kampanija sabrałasia budavać ofisny centr i tolki niekalki pavierchaŭ pakinuć pad kvatery, prajekt zamarozili. A «Liŭbieł» prapaŭ. Nivodzin z numaroŭ kampanii nie adkazvaje, a naviedvalnikaŭ čakajuć zamknionyja dźviery. Chto pakłapaciŭsia pra vyhlad chatki i pieratvaryŭ jaje ŭ les, zastajecca nieviadomym.
