Kiraŭnika paŭnočnairłandskaj partyi Šyn Fejn Džery Adamsa zatrymała palicyja ŭ suviazi z zabojstvam 37-hadovaj Džejn MakKonvajł, maci 10 dziaciej, zdznjśnienym IRA ŭ 1972 hodzie. Adams asprečvaje, što maje da hetaha niejkaje dačynieńnie. Jon sam pryjšoŭ u palicyju pa vykliku i byŭ zatrymany paśla apytańnia.
MakKonvajł, žycharka Biełfasta, była — pavodle palicyi — zastrelenaja ŭdzielnikami Irłandskaj respublikanskaj armii (IRA), jakija padazravali, što žančyna — infarmatarka brytanskaha vojska. Jaje pareštki byli znojdzienyja tolki ŭ 2003 hodzie na adnym ź irłandskich plažaŭ.
Adams, kiraŭnik Šyn Fejn, partyi, jakaja źjaŭlajecca palityčnym pradstaŭnictvam IRA, zaŭždy admaŭlaŭ, što braŭ niepasredny ŭdzieł u zbrojnych akcyjach IRA i što mieŭ niejkuju suviaź z hetym zabojstvam.
IRA, jakaja pradstaŭlaje katalickuju mienšaść Paŭnočnaj Irłandyi, tryccać hadoŭ vajavała z pratestantami i ŭładami Paŭnočnaj Irłandyi, jakija padtrymlivała brytanskaje vojska. Metaj IRA była adździaleńnie Paŭnočnaj Irłandyi ad Vialikabrytanii i dałučeńnie da Irłandskaj respubliki. Zabojstvy i terakty skončylisia tolki paśla mirnaj damovy 1998 hoda.
