Napiaredadni Dnia Pieramohi aktyvisty biełaruskaj Libieralna-demakratyčnaj partyi (ŁDP) pačali razdaču ŭ krainie hieorhijeŭskich stužak. Tak, na adnoj z vulic u Minsku byŭ zaŭvažany za hetym zaniatkam namieśnik kiraŭnika ŁDP, viadomy artyst Jaŭhien Kryžanoŭski.
Na pytańnie karespandenta BiełaPAN, ci nie biantežyć jaho toje, što staŭleńnie da hieorhijeŭskich stužak ciapier nieadnaznačnaje ŭ suviazi z padziejami va Ukrainie, artyst-palityk adkazaŭ: «Nieadnaznačnaje staŭleńnie da hieorhijeŭskich stužak u tych, chto nieadnaznačna stavicca da našaj Pieramohi, tamu što heta simvał Pieramohi — tut užo ničoha nie zrobiš. I toje, što siońnia kažuć, byccam heta simvał Rasijskaj impieryi — my jaho z hetym nie źviazvajem. Heta simvał 9 maja, pieramohi nad fašyzmam. Tamu my ich ciapier i razdajom».
Temu pradoŭžyŭ na pres-kanfierencyi 6 maja pieršy namieśnik staršyni ŁDP Aleh Hajdukievič:
«Kali my abviaścili ŭ ŚMI, što razdajom hieorhijeŭskija stužki, my ž nie chacieli heta afišavać — štohod hetym zajmajemsia, i nie tolki my, pa ŭsim śviecie ich razdajuć. I voś apazicyja zamiest taho, kab štości rabić napiaredadni vybarčych kampanij, vystupiła z zajavaj ab tym, kab zabaranić u Biełarusi razdavać hieorhijeŭskuju stužku. Vy što, idyjoty? U lubym histaryčnym simvale možna znajści niehatyŭ, ale dla bolšaści ludziej hieorhijeŭskaja stužka heta simvał pieramohi ŭ Vialikaj Ajčynnaj vajnie. Viešajučy jaje na łackan pinžaka ci na mašynu, my pakazvajem tolki adno — hety simvał byŭ na ŭznaharodach našych dziadoŭ-pieramožcaŭ. Dyk što, mnie miedali dzieda vykinuć tolki tamu, što heta niejak źviazana z padziejami va Ukrainie?»
Aleh Hajdukievič paabiacaŭ, što jon i inšyja pradstaŭniki ŁDP pryjduć na kanhres pa abrańni adzinaha kandydata ŭ prezidenty ad apazicyi z hieorhijeŭskimi stužkami.
