Niadaŭna vyśvietliłasia, što niečakany abarot nabyła sprečka staličnaha deviełapiera Arkadzia Izraileviča i Minharvykankama. Ekanamičny sud Minska admoviŭ meryi ŭ zadavalnieńni isku ab skasavańni inviestycyjnaj damovy z kampanijaj «Saŭt Viestern». Ale staličnyja čynoŭniki nie śpiašajucca vykonvać rašeńnie suda, a šukajuć inšyja padstavy dla admovy ŭ budaŭnictvie biźnies-centra ŭ centry Minska.
Kampanija «Saŭt Viestern» mieła namier pabudavać 12-paviarchovy biźnies-centr z prybudavanym budynkam banka i adkrytaj aŭtastajankaj pa vuł. Zasłaŭskaj pamiž damami №17 i 11. U lutym 2013 hoda była zaklučana inviestycyjnaja damova pamiž kampanijaj i Minharvykankamam. Ale praz 3,5 miesiacy haradskija ŭłady vyrašyli admovicca ad svajho podpisu. Z červienia minułaha hoda kamitetam ekanomiki Minharvykankama była raspačataja «pierapiska, nakiravanaja na zbor dokaznaj bazy i ŭdakładnieńnie padstaŭ dla skasavańnia inviestycyjnaj damovy». U pačatku hetaha hoda meryja źviarnułasia ŭ sud.
Jašče 19 sakavika ekanamičny sud Minska admoviŭ Minharvykankamu u zadavalnieńni iskavych patrabavańniaŭ u poŭnym abjomie. Sud abhruntavaŭ svajo rašeńnie vielmi prosta: paśla zaklučeńnia pahadnieńnia «nie adbyłosia istotnaje źmianieńnie abstavinaŭ, jakija źjaŭlajucca padstavaj da skasavańnia damovy». Tak, naprykład, pra adsutnaść horadabudaŭničaha prajekta detalovaha płanavańnia terytoryi (PDP) i admoŭnyja vyniki hramadskich abmierkavańniaŭ było viadoma da padpisańnia inviestdamovy. Akramia taho, padpisaŭšy pahadnieńnie, Minharvykankam «pahadziŭsia z tym, što finansavaj płaciežazdolnaści, arhanizacyjnaha-kadravaha patencyjału, vopytu raboty adkazčyka i jaho zasnavalnika dastatkova dla realizacyi inviestprajekta».
Apielacyjnaja skarha Minharvykankama razhladałasia ŭžo vyšejstajačaj kalehijalnaj instancyjaj ekanamičnaha suda, jakaja pahadziłasia z dovadami suda pieršaj instancyi i pakinuła rašeńnie ŭ sile. Bolš za toje, u sudzie było pakazana na dapuščanyja čynoŭnikami parušeńni inviestycyjnaha zakanadaŭstva. Takim čynam kala miesiaca tamu rašeńnie ŭstupiła ŭ zakonnuju siłu.
Zdavałasia b, sud pastaviŭ kropku ŭ sprečcy Minharvykankama i «Saŭt Viesterna» i realizacyja inviestprajekta pavinna była praciahnucca. Tamu inviestar prapanavaŭ uładam zaklučyć dadatkovaje pahadnieńnie ab padaŭžeńni terminu realizacyi prajekta ŭ ramkach inviestdamovy na termin raspracoŭki i zaćviardžeńnia prajekta detalovaj płaniroŭki terytoryi. Adnak niadaŭniaja kamisija pa inviestycyjnaj dziejnaści ŭ Minharvykankamie vyrašyła, što «zaklučeńnie dadatkovaha pahadnieńnia niemetazhodna». Čamu? Dy ŭsio pa tych ža punktach, jakija ekanamičny sud pryznaŭ nieabhruntavanymi dla skasavańnia inviestdamovy.
«Kamitet ekanomiki, akazvajecca, u nas novaja halina ŭłady, jakoj dazvolena nie vykonvać rašeńni suda», — nie bieź ironii kaža minski deviełapier Arkadź Izrailevič (pradstaŭnik zarehistravanaj u Łondanie kampanii South Western Investments). Jon padkreślivaje, što «sudom paćvierdžany ŭsie tyja dovady, jakija my sprabavali danieści da Minharvykankama ŭ pierapiscy na praciahu amal hoda, padstaŭ dla skasavańnia niama». «Adsutnaść PDP pryznana sudom padstavaj dla źmieny terminu realizacyi inviestprajekta, a nie jaho skasavańnia», — adznačyŭ jon.
Biźniesmien taksama adznačaje, što «ŭsio zajavy i skarhi Minharvykankama, što padajucca ŭ sud, strakaciać spasyłkami na «daručeńni kiraŭnika dziaržavy, kiraŭnika administracyi prezidenta, mierkavańnie prakuratury, kancepcyju nacyjanalnaj biaśpieki, pratakoły pasiadžeńnia rabočych hrup, listy sakrataryjata Savieta Biaśpieki» i inšyja hučnyja struktury i składvajecca ŭražańnie, što jany takim čynam sprabujuć zamaskiravać nieabhruntavanaść svaich ułasnych dovadaŭ».
Zrešty, u Minharvykankamie znajšli novy vychad ź situacyi, kab hetamu prajektu nie dać realizavacca. Niadaŭna kamitet architektury i horadabudaŭnictva Minharvykankama daručyŭ «Minskhrada» raspracavać PDP terytoryi ŭ miežach pr. Pieramožcaŭ — pr. Mašerava — vuł. Damašeŭskaja — čyhunka — vuł. Kalvaryjskaja — vuł. Mielnikajte. Pry hetym pryznali niemetazhodnym uličyć ŭ prajekcie detalovaha płanavańnia 12- paviarchovy biźnies-centr z parkinham. Varta nahadać, što raniej pry razhladzie adkarektavanaj architekturnaj kancepcyi na horadabudaŭničym saviecie «adznačany vysoki prafiesijny ŭzrovień dadzienaha abjekta, a jaho raźmiaščeńnie pryznana pryncypova mahčymym».
U Minharvykankamie kažuć, što akramia ŭsiaho inšaha ich biantežyć dziełavaja reputacyja Arkadzia Izraileviča i spasyłajucca na vysnovy śpiecsłužbaŭ. Adnak abhruntavanaści dadzienych zajaŭ u sudzie nie ŭbačyli. Pry hetym biznesmen padaŭ vypiski z bankaŭ, pradstaŭniki jakich nazyvajuć Izraileviča «nadziejnym dziełavym partnioram i biznesmenam».
Dadzieny kanflikt pakazvaje, jak padpisańnie inviestdamovy ad imia Respubliki Biełaruś jašče nie jość harantyjaj zachavańnia zakonnych intaresaŭ patencyjnych inviestaraŭ, jak pra heta dekłarujecca z vysokich trybun. Zvyčajna pakarańnie niasuć biźniesmieny, jakija nie vykonvajuć svaich abiacańniaŭ. Vypadak, kali biełaruski sud u sprečcy pryvatnika i ŭładaŭ nie padtrymaŭ apošnich, źjaŭlajecca redkaściu. Značyć, staličnyja ŭłady ŭ svaich namierach akazalisia nie da kanca paśladoŭnymi…
