Słužba biaśpieki Ukrainy śćviardžaje, što maje dokazy vykarystańnia rasijskimi srodkami masavaj infarmacyi technałohij infarmacyjna - psichałahičnaha ŭździejańnia na hledačoŭ.
Takuju zajavu na bryfinhu ŭ aŭtorak zrabiła načalnik pres-słužby SBU Maryna Astapienka.
Pavodle jaje słoŭ, SBU dva miesiacy vyvučała videamateryjały, jakija tranślujuć rasijskija telekanały, i vyjaviła ŭ ich zabaronienyja mižnarodnym zakanadaŭstvam technałohii psichałahičnaha ŭździejańnia na aŭdytoryju, u tym liku tak zvany «25-y kadr».
«Jany adnosiacca da niebiaśpiečnych mietadaŭ infarmacyjna-psichałahičnaha ŭździejańnia», — padkreśliła Astapienka.
Na bryfinhu byŭ prademanstravany film pa vypusku navin na telekanale «Rasija-24».
Na praciahu ŭsiaho vypusku pra padziei ŭ Adesie 2 maja ŭ kucie ekrana źjaŭlajucca małaprykmietnyja nadpisy: «padpaliŭ pravy siektar», «ludziej zabivali banderaŭcy», «Nachvardyja zabojcy».
Taksama ŭ SBU padkreślili, što rasiejskija telekanały vykarystoŭvajuć i inšyja mietady ŭździejańnia na hledačoŭ.
U pryvatnaści, jany raspaŭsiudžvajuć napaŭpraŭdu, spasyłajucca na niejkija «infarmavanyja krynicy», demanstrujuć detalizavanyja sceny zabojstvaŭ i hvałtu i sprabujuć emacyjna ŭździejničać na hledača.
Psichołah SBU Aksana Sierbinienka śćviardžaje, što tak zvanaja technałohija «25-ha kadra» źjaŭlajecca dastatkova staroj i nie duža efiektyŭnaj.
«Jość naviejšyja sposaby ŭpłyvać na aŭdytoryju. Rasijskija ŚMI vykarystoŭvajuć «25-y kadr», mabyć, jak daŭni i nadziejny mietad», - padkreśliła jana.
U svaju čarhu ŭ SBU paabiacali, što buduć reahavać na takija dziejańni rasijskich miedyja «u pravavym poli».
Jak viadoma, rasijskich žurnalistaŭ užo nieadnarazova abvinavačvali ŭ raspaŭsiudzie prapahandy Kramla. Niadaŭna razam z bajevikami byli zatrymanyja žurnalisty LifeNews Aleh Sidziakin i Marat Sajčanka, jakija, jak ličać u Kijevie, akazvali infarmacyjnaje sadziejničańnie teraryzmu.