29 kastryčnika
Miron Dziadam
Bieł‑čyrvona‑bieły ściah źjaviŭsia a 10‑j viečaru ŭ Viciebsku nad domam №25 pa vulicy Maksima Horkaha. Pavodle Barysa Chamajdy, da ściahu była prymacavanaja cydułka sa słovami «Z pavahaj da našych Dziadoŭ. Miron». Praz paŭhadziny ściah źniali supracoŭniki Pieršamajskaha RUUS.
Tajamničaje źbićcio
Siabra KCHP‑BNF Jan Dziaržaŭcaŭ paviedamiŭ, što ŭviečary 29 kastryčnika jahonaha 18‑hadovaha syna źbili dvoje nieviadomych. Sp. Dziaržaŭcaŭ miarkuje, što napad na syna mahli zrabić tyja, chto ŭ žniŭni hetaha hodu dasłaŭ jamu list z pahrozami ad imia Viciebskaj filii niezarehistravanaj arhanizacyi RNIE.
30 kastryčnika
Aryštavali ŭlotki
Aktyvist Partyi BNF Vacłaŭ Areška byŭ zatrymany i adviezieny ŭ RUUS Centralnaha rajonu z ulotkami pra «Sacyjalny marš». Sp. Arešku adpuścili, pakinuŭšy ŭlotki ŭ pastarunku dla ekspertyzy.
Aštrafavali za Dziady
La Viciebsku milicyjanty zatrymali 25 ¬udzielnikaŭ ušanavańnia pamiaci prodkaŭ. Impreza prachodziła ź inicyjatyvy KCHP‑BNF na ŭźlesku kala vioski Palai. U časie akcyi byŭ ustalavany memaryjalny kryž, prysutnyja praśpiavali himn «Mahutny Boža». Milicyjanty na čale z majoram Alaksandram Lilenkam kvalifikavali akcyju jak «niesankcyjanavany mitynh». Usich prysutnych na aŭtobusie, jakim jany pryjechali ŭ Palai, milicyjanty zmusili pajechać u RUUS Viciebskaha rajonu.
Paźniej sud Viciebskaha rajonu pryznaŭ Barysa Chamajdu, Jana Tałpyhu, Siarhieja Bielazieku, Źmitra Jakaŭleva i Siarhieja Kavalenku za arhanizataraŭ akcyi. Z. Jakaŭleŭ byŭ pakarany štrafam na 1 b.v. (31 tys. rub.), astatnija atrymali pa 20 b.v. (620 tys. rub.). Prysud vyniesła sudździa Alena Cierachava.
31 kastryčnika
Fińkieviča aznajomili z novym abvinavačvańniem
Arturu Fińkieviču aficyjna pradjavili novaje abvinavačvańnie. Śledčy Alaksandar Leskaviec u prysutnaści advakatki abvieściŭ, što śledčyja dziejańni skončanyja i jość dokazy viny. Maładafrontaŭca vinavaciać u parušeńni art. 415 KK RB «Admova ad adbyvańnia pakarańnia ŭ vyhladzie abmiežavańnia voli». Palitviaźniu pahražaje pazbaŭleńnie voli terminam ad 6 miesiacaŭ da 3 hadoŭ z adbyvańniem pakarańnia ŭ kalonii ahulnaha režymu. Viasnoj 2006 h. A. Fińkieviča pakarali 2 hadami «chimii» za palityčnyja hrafici. Vyjści na volu chłopiec musiŭ užo praź miesiac.
Taciana Klimava nia maje viestak
Žonka palitviaźnia Andreja Klimava Taciana zajaviła žurnalistam, što apošni ty¬dzień jana nia moža atrymać listoŭ ad muža i nia viedaje, ci dachodziać jaje pasłańni. U Mazyrskaj kalonii joj paviedamili, što Klimaŭ amal štodnia nakiroŭvaje listy damoŭ, ale dziŭnym čynam jany da jaje nie traplajuć. Dva tydni tamu Klimaŭ napisaŭ žoncy litaralna nastupnaje: «Ja trapiŭ u piekła. Mnie zastajecca dažyć da paniadziełka, kab ubačyć piekła va ŭsioj jaho vieličy». Nahadajem, što A.Klimaŭ byŭ asudžany da 2 hadoŭ źniavoleńnia za artykuł u internecie, u jakim beściŭ A. Łukašenku kiepskimi słovami.
Skrali kryž
Staršynia Haradockaj rajonnaj arhanizacyi Partyi BNF Leanid Aŭtuchoŭ paviedamiŭ, što nieviadomyja skrali memaryjalny kryž, zrobleny i ŭstalavany im na ŭłasnyja srodki ŭ pamiać zahinułych na Haradoččynie ŭdzielnikaŭ antybalšavickaha paŭstańnia 1918 h. Sp. Aŭtuchoŭ źviarnuŭsia z zajavaj u milicyju. Pavodle jahonych słovaŭ, načalnik RUUS spačatku admaŭlaŭsia prymać zajavu i navat pahražaŭ aštrafavać Ł. Aŭtuchova «za samavolnaje ŭstanaŭleńnie kryža». Zajavu pryniali tolki tady, kali aktyvist paabiacaŭ paskardzicca ŭ prakuraturu.
1 listapada
TBŠ papiaredzili
Ministerstva justycyi vyniesła piśmovaje papiaredžańnie HA «Tavarystva biełaruskaj škoły». Padstavaj stała praviadzieńnie vystavy ŭ pamiaškańni haradzienskaj struktury TBŠ, pryśviečanaj dziejnaści niezarehistravanaj arhanizacyi «Małady front». Pavodle Minjustu, takim čynam «TBŠ» spryjaje dziejnaści zabaronienaj arhanizacyi.
Zatrymańni pierad «Sacyjalnym maršam»
Adnaho z zajaŭnikaŭ «Sacyjalnaha maršu», namieśnika staršyni «Maładych demakrataŭ» Michaiła Paškieviča zatrymali ŭ metro, kali toj razam sa svaim siabram Źmitrom Kavałhinym raspaŭsiudžvaŭ ahitacyjnyja materyjały da akcyi 4 listapada. Paśla zatrymańnia ich advieźli ŭ UUS metrapalitenu.
Na stancyi metro «Traktarny zavod» byli zatrymanyja Siaržuk Klujeŭ i Mikoła Siarhiejenka. Jany razdavali infarmacyjnyja materyjały da «Maršu». Usich zatrymanych abvinavacili ŭ parušeńni art. 23.34 AK «Parušeńnie paradku praviadzieńnia masavych akcyj».
