Amierykanskaja klinika UPMC, što znachodzicca ŭ štacie Piensilvanija, praviadzie vyprabavańni inavacyjnaha mietada vyratavańnia pacyjentaŭ ź ciažkimi traŭmami i vialikaj kryvastrataj.
Pavodle statystyki, pry ciažkim ranieńni i masiŭnaj kryvastracie vyžyvajuć mienš za 10% čałaviek. Pryčynaj śmierci stanovicca spynieńnie serca, bo praz stratu kryvi arhanizmu nie chapaje kisłarodu. Krytyčny stan raźvivajecca za ličanyja chviliny, i ŭračy biaśsilnyja ŭ bolšaści situacyj.
Ale kamanda daśledčykaŭ pad kiraŭnictvam Semiuela Cišermana, Pitera Sefara i Peta Kačaneka prapanavali ŭvodzić ciažka paranienych ludziej u anabijoz, kab zapavolić pamirańnie. Heta dazvolić chirurham vyhadać čas i spynić kryvaciok.
Apisańnie pracedury (pa-anhlijsku).
Dla ŭviadzieńnia čałavieka ŭ stan anabijozu praz aortu paranienaha ŭ jaho arhanizm buduć zakačvać chałodny salavy rastvor, jaki raspaŭsiudzicca pa ciele i vyciśnie kroŭ. U viniku cieła astynie da tempieratuty kala 10°S, pry jakoj mietabalizm zapavolvajecca. Daśledčyki zapeŭnivajuć, što čałavieka možna viarnuć da žyćcia navat praz 4 hadziny, znoŭ zakačaŭšy ŭ cieła praapieravanaha kroŭ i nahreŭšy cieła da narmalnaj tempieratury.
Cišerman kaža, što da idei vykarystańnia anabijozu dla lačeńnia ciažkaparanienych padšturchnuli vypadki ŭtapleńnia ludziej ŭ ledzianoj vadzie. Paśla reanimacyjnych mierapryjemstvaŭ niekatoryja z takich tapielcaŭ viartalisia da žyćcia praz davoli praciahły čas.
Semiuel Cišerman raskazvaje pra novuju mietodyku (pa-anhlijsku).
Miedyki praviali ekśpierymienty na śvińniach i atrymali vielmi aptymistyčnyja vyniki: 90% žyvioł pieražyli praceduru.
Ciapier daśledčyki zajavili, što ŭ praviaduć daśledavańni na dziesiaci pacyjentach kliniki UPMC, jakija pakutujuć ad kryvastraty i spynieńnia serca, vyklikanaj ranieńniem. Amierykanski ŭrad vydaŭ dazvoł na praviadzieńnie vyprabavańniaŭ pracedury na ludziach jašče ŭ 2011 hodzie, adnak tolki ciapier daśledavańni na pacyjentach pierajšli ŭ aktyŭnuju fazu.
