Na žychara Bresta, jaki 3-4 červienia prasiadzieŭ na 36-mietrovaj aśviatlalnaj apory na homielskim čyhunačnym vakzale 15 hadzin, supracoŭnikami AUS na transparcie składzieny administracyjny pratakoł pa artykule 17.1 KaAP (drobnaje chulihanstva).
Jak paviedamili BiełaPAN u homielskim AUST, drobnaje chulihanstva ŭ dadzienym vypadku padpadaje pad farmuloŭku artykuła 17.1 «… inšyja naŭmysnyja dziejańni, jakija parušajuć hramadski paradak, dziejnaść arhanizacyj abo spakoj hramadzian». Parušalniku pahražaje štraf ad 2 da 30 bazavych vieličyń abo aryšt.
Pakul ža žychar Bresta Alaksiej prachodzić daabśledavańnie u Homielskaj abłasnoj psichijatryčnaj balnicy, dzie prabudzie jak miarkujecca, da piatnicy 6 červienia. Pavodle papiaredniaj infarmacyi, vidavočnych psichičnych adchileńniaŭ u maładoha čałavieka lekary nie vyjavili.
Nahadajem, 33-hadovy mužčyna zabraŭsia na aśviatlalnuju aporu na čyhunačnym vakzale ŭ Homieli 3 červienia prykładna ŭ 11.30. Jon pravioŭ tam kala 15 hadzin. Bieraściejec spuściŭsia kala 2 nočy paśla taho, jak jaho paprasiła zrabić heta siastra, jakaja pryjechała z Bresta razam ź ciotkaj.
Da pryjezdu rodnych mužčynu sprabavali ŭhavaryć spuścicca ŭniz kala 15 hadzin. Ź im pracavaŭ psichołah MNS, jaje da mužčyny ŭzdymali na admysłovaj aŭtaleśvicy. Adnak bieraściejec nie reahavaŭ, nie vystaŭlaŭ nijakich patrabavańniaŭ, nie adkazvaŭ. Pad vyškaj ustalavali vyratavalny kub. Taksama pryjechali pradstaŭniki miascovaj ułady, chutkaja dapamoha i milicyja.
U 23.30 prybyli svajaki, padnialisia da mužčyny ŭ kałyscy aŭtaleśvicy MNS i razmaŭlali ź im. U vyniku toj samastojna spuściŭsia na ziamlu ŭ pačatku treciaj hadziny Bnočy.
