Imiony snajpieraŭ, jakija stralali ŭ aktyvistaŭ Majdana 19-20 lutaha, viadomyja, adnak ich nichto nie zatrymlivaje. Pra heta paviedamiŭ kiraŭnik parłamienckaj časovaj śledčaj kamisii pa rasśledavańni padziej na Majdanie, narodny deputat Hienadź Maskal.
«U «Apieratyŭnym płanie niejtralizacyi ekstremisckaj dziejnaści ŭdzielnikaŭ pratestnych mierapryjemstvaŭ», raspracavanym antyterarystyčnym centram SBU (dalej ATC) skazana: «Z metaj niedapuščeńnia ździajśnieńnia złačynstva, jakoje, mahčyma, rychtujecca, kiraŭnikom ATC pa ŭzhadnieńni sa staršynioj SBU abjaŭlajecca praviadzieńnie śpiecapieracyi «Bumieranh» i zadziejničajucca ŭsie nieabchodnyja siły i srodki. Praviadzieńnie siłavoj akcyi siłami Unutranych vojskaŭ i śpiecpadraździaleńnia «Bierkut» MUS Ukrainy ŭ ramkach apieracyi «Chvala». Usiaho płanujecca pryciahnuć da 10000 bajcoŭ UV i kala 12000 supracoŭnikaŭ milicyi, ź ich 2000 — «Bierkuta», — paviedamiŭ Maskal.
Jon taksama raspavioŭ, što ŭ płanie vyrazna vyznačany zadačy hrup: «Hrupie prykryćcia i ahniavoj padtrymki. Znachodzicca ŭ hatoŭnaści pa kamandzie akazać padtrymku ahniom asnoŭnym hrupam zachopu, zabiaśpiečyć prachod u budynak, niejtralizavać uzbrojenych złačyncaŭ, jakija ŭciakuć ź miesca padziej. Hrupie snajpieraŭ. Akazać padtrymku ahniom asnoŭnym hrupam zachopu. Pastajanna dakładvać pra źmieny pry praviadzieńni šturmavych dziejańniaŭ. Raźmierkavańnie asabistaha składu šturmavoj hrupy, raźlik uzbrajeńnia i śpiecyjalnyja srodki i ŭzajemadziejańnie pamiž padraździaleńniami ŭskładziena na kiraŭnika šturmavoj hrupy pałkoŭnika Čaŭhaniuka U.I. Vyk.: CSA «A» SBU. Adk.: Prysiažny Aleh Uładzimiravič, KZ: 39-05, 067-328-37-70».
Pavodle infarmacyi Maskala, punktam 5 apieratyŭnaha płana paznačany raźmiaščeńni snajpierskich par: «Raźmiaščeńnie snajpierskich par na dachach i ŭ pamiaškańniach budynkaŭ (vuł.Chryščacik, 7/11, 13, 19a, 22). Daviedačna: U vypadku nieabchodnaści budzie zadziejničany viertalot Mi-8. Vyk.: UV MUS, CSA «A» SBU».
Kiraŭnik VSK taksama raspavioŭ pra «Płan praviadzieńnia śpiecyjalnaj apieracyi», dzie ŭ punkcie 4 vyznačana, što ŭ hrupu prykryćcia i ahniavoj padtrymki i hrupy snajpieraŭ uvachodziać: hrupa prykryćcia i ahniavoj padtrymki 2-ha ŭpraŭleńnia — 10 supracoŭnikaŭ, padraździaleńni MUS Ukrainy staršejšy: p-k Šajtanaŭ V.A.; hrupa snajpieraŭ — 7 supracoŭnikaŭ, starejšy: p/p-k Byčkoŭski A.M. namieśnik: m-r Bublik A.V.
«Heta značyć, pałkoŭnik Słužby biaśpieki Ukrainy Šajtanaŭ V.A., pavodle dadzienych Płana, uznačalvaŭ hrupu prykryćcia i ahniavoj padtrymki, nabranaj ź liku supracoŭnikaŭ 2-ha Upraŭleńnia śpiecpadraździaleńnia «Alfa» SBU, u jakuju byli prykamandziravany jašče 10 supracoŭnikaŭ padraździaleńniaŭ MUS Ukrainy. Na pieryjad zhadanych padziejaŭ mienavita pałkoŭnik Šajtanaŭ V.A. byŭ načalnikam 2-ha ŭpraŭleńnia śpiecpadraździaleńnia «Alfa». Liču, što jaho nieabchodna terminova vyklikać na dopyt pa infarmacyi pa składzie ŭsioj hrupy prykryćcia i ahniavoj padtrymki, proźviščaŭ 10-ci supracoŭnikaŭ padraździaleńniaŭ MUS, prykamandziravanych u jaho hrupu. Pa majoj infarmacyi, usie jany byli ŭzbrojeny aŭtamatami Kałašnikava i snajpierskimi vintoŭkami. Starejšym druhoj hrupy snajpieraŭ ź liku 7 supracoŭnikaŭ SBU byŭ padpałkoŭnik Byčkoŭski A.M., — heta mienavita toj čałaviek, jaki mieŭ pazyŭny «Miron». Razmovy snajpieraŭ, u tym liku i Byčkoŭskaha, vykłaŭ u Internecie narodny deputat Ukrainy A. Hrycenka. Nieadnarazovyja vykliki Šajtanava, Byčkoŭskaha i Bublika na pasiadžeńnie VSK usie troje ihnarujuć. Słužba biaśpieki Ukrainy nakiroŭvaje adpiski, što niechta ź ich na balničnym, a astatnija zadziejničana ŭ ATA», — paviedamiŭ Maskal.
Jon padkreśliŭ, što da 2003 hoda siońniašni padpałkoŭnik Byčkoŭski byŭ dziejučym supracoŭnikam FSB Rasii, a ŭ 2008 hodzie pryznačany načalnikam snajpierskaha adździeła Ŭpraŭleńnia «Alfa» SB Ukrainy.
Maskal raspavioŭ, što tahačasny kiraŭnik SBU Alaksandr Jakimienka asabista addavaŭ Centru śpiecyjalnych apieracyj «A» SBU niezakonny zahad pryniać udzieł u siłavoj padtrymcy razhonu mitynhoŭcaŭ na Majdanie. «Na schiemie vyrazna pakazana miescaznachodžańnie snajpierskich hrup — heta dach hatela «Ukraina» i dach Ukrspažyŭsajuza (pierakryžavańnie Chryščacika i vuł. Instytuckaj, nasuprać Doma prafsajuzaŭ). Akramia nazvanych damoŭ, snajpierskija pary ŭnutranych vojskaŭ MUS i śpiecpadraździaleńnia «Alfa» byli raźmieščany na dachach i ŭ pamiaškańniach budynkaŭ pa vuł. Chryščacik: 7/11, 13, 19A, 22», — adznačyŭ jon.
Snajpierskija hrupy śpiecpadraździaleńnia MUS Ukrainy «Sokał» znachodzilisia na dachu budynka Kabinieta ministraŭ Ukrainy, a snajpierskija hrupy Dziaržaŭnaj słužby achovy — na dachu Administracyi prezidenta Ukrainy i dachu Doma z chimierami (pa vuł. Bankavaja). Supracoŭniki śpiecpadraździaleńnia «Bierkut» HU MUS Ukrainy ŭ Kijevie, uzbrojenyja aŭtamatami Kałašnikava (kalibr 7,62), strelbami Fort-500 i snajpierskimi vintoŭkami, znachodzilisia pamiž Kastryčnickim pałacam i Nacyjanalnym bankam Ukrainy.
