U muziei «Alivaryi» vučać adroźnivać pachi i vodary piva, kab pavysić kulturu ŭžyvańnia ałkaholu.
Što supolnaha ŭ słovaŭ «bukiet», «cieła» i «nota»? Toje, što ŭsie jany charaktaryzujuć piva. Bukiet — heta kompleks vodaraŭ, ułaścivych peŭnamu hatunku. Cieła — adčuvańnie nasyčanaści, jakoje dajuć vodar, pach i tekstura napoju. I nota — ledźvie čutnaja admietnaja rysa piŭnoha vodaru.
Što treba dla dehustacyi
Dla dehustacyi piva treba padrychtavać abstanoŭku, piva i samoha dehustatara. Važna, kab ništo nie zaminała, tamu ŭ pamiaškańni musić być minimum rečaŭ, kamfortnaja tempieratura (+20 °S ±2 °S), dobraja vientylacyja i aśviatleńnie dy nijakich inšych pachaŭ.
Lepšy čas dla dehustacyi — pierad abiedam. Nie abaviazkova pravodzić jaje našča, ale i najadacca niepažadana.
Patrabavańni da dehustataraŭ
Dehustatar, naturalna, pavinien być paŭnaletnim. Poł nie maje značeńnia, choć na praktycy čaściej sustrakajucca mužčyny. Važna, kab u dehustatara było ŭsio ŭ paradku z usprymalnaściu smakaŭ, chacia b minimalnyja tearetyčnyja viedy i cikavaść da piva. A taksama — dobry nastroj i samaadčuvańnie. Nie testujcie piva, kali vy stamilisia ci vam balić hałava. Cikava, što adno z patrabavańniaŭ — być kamunikabielnym. Udzielniki dehustacyi paśla jaje zaviaršeńnie dzielacca adčuvańniami, dyskutujuć, dajuć acenki napojam.
Isnujuć roznyja mietady dehustacyi. Badaj što kožny moža pravieści test na «pitkaść» — nabyć piva roznych hatunkaŭ, zaprasić haściej i acanić… abjom vypitaha.
U muziei «Alivaryi» dla dehustacyi vykarystoŭvajuć apisalnyja dy paraŭnalnyja testy. Pačynajem.
Etap 1. Raspaznavańnie smakaŭ na vadzie
Dehustataram vynosiać piać pranumaravanych šklanak z vadoj. U kožnaj ź ich — adzin ź piaci asnoŭnych smakaŭ: salony, sałodki, horki, kisły i śpirtavy (jak asobny smak). Udzielniki dehustacyi zanatoŭvajuć zdahadki ŭ dehustacyjnaj karcie.
Etap 2. Raspaznavańnie smakaŭ na pivie
Zatym zadača ŭskładniajecca. Na stoł dehustatara prynosiać usio tyja ž šklanki ź piaćciu smakami, ale ciapieraka zamiest vady ŭ ich piva. Dehustatary-pačatkoŭcy mohuć pabłytać nie tolki śpirt z horkim, ale navat sałodkaje z salonym.
Etap 3. Raspaznavańnie vodaraŭ na vadzie
Paśla smaku pravodzicca dehustacyja vodaraŭ piva. Tolki ŭjavicie: u pryrodzie ažno 32 tysiačy vodaraŭ hetaha napoju! Dehustataram-pačatkoŭcam prapanujucca šeść ź ich, najbolš raspaŭsiudžanyja i jarkija. Vodary byvajuć jak pažadanyja, ci stanoŭčyja, «smačnyja», tak i admoŭnyja (staronnija).
Jak vyznačyć admoŭnyja vodary
1. Dyjacetył (nahadvaje masła)
Nakryjcie šklanku dałońniu i ŭskałychnicie, kab «vyzvalić» vodar. Prymicie ruku i zrabicie niekalki karotkich udychaŭ. Dyjacetył vyznačajuć pa śmietankovym prysmaku ŭ rocie. Pryčyna jaho źjaŭleńnia ŭ pivie — maślanaja kisłata, utvoranaja droždžami pry fiermientacyi.
2. «Kaciny» pach
Hety vodar vy dakładna ni z čym nie zbłytajecie. «Ćchu!» — adzinaje, što možna pra jaho skazać. Pryčyna taho, što ad piva patychaje praduktami žyćciadziejnaści kocikaŭ — zaražeńnie syraviny ekstraktam droždžaŭ. Dehustacyja — jak i ŭ papiarednim prykładzie.
3. Izavalarjanavy vodar (pachnie aptekaj albo syram)
Utvarajecca za košt vykarystańnia niajakasnaha ci staroha chmielu. Dla dehustacyi ŭskałychnicie šklanku ź pivam, kab «vyzvalić» vodar, prybiarycie ruku i zrabicie adzin doŭhi ŭdych.
Vyznačajem stanoŭčyja vodary
1. Etyłhieksanat (jabłyčny vodar)
Kali ŭ pivie adčuvajecca smak jabłyka, heta dobry znak. Etyłhieksanat u roznaj stupieni prysutničaje va ŭsich hatunkach piva. Dla dehustacyi ŭskałychnicie šklanku, padniasicie da nosa i zrabicie adzin hłyboki ŭdych.
2. Poźniaje achmialeńnie
Heta pažadanaja dla niekatorych hatunkaŭ śvietłaha piva ŭłaścivaść. Źjaŭlajecca ŭ vyniku naŭmysnaha dabaŭleńnia ziernia chmielu.
Pracedura vyznačeńnia hetaha vodaru bolš składanaja, čym papiarednija. Uskałychnicie šklanku, padniasicie da nosa i rabicie karotkija ŭdychi. Potym zaciśnicie nos palcami. Nabiarycie ŭ rot 20—25 mł piva i paboŭtajcie ŭ rocie kala 10 siekund. Jak tolki prahłyniecie, raściskajcie nos i rabicie ŭdych. Vy musicie adčuć hłyboki traviany ci draŭniany vodar, nibyta ad nastojki.
3. Izaamiłacetat (nahadvaje barbarys ci dziušes)
Hety saładkavaty pach najbolš čutny ŭ pšaničnym pivie. Utvarajecca droždžami pry zakisańni. Paradak dehustacyi — jak u vypadku z dyjacetyłam.
Dehustatary zanatoŭvajuć, jakija asacyjacyi ŭ ich vyklikajuć tyja ci inšyja vodary. Adčuvańni mohuć roźnicca: adzin učuje pach apteki, inšy — syru.
Etap 4. Raspaznavańnie vodaraŭ na pivie
A ciapier pasprabujcie adčuć usie šeść vodaraŭ na pivie. Pahadziciesia, u pivie adroźnieńni nie takija vyraznyja.
Hałoŭnaje dla dehustacyi — praktyka. Uzhadajcie hetyja niachitryja praviły, kali źbieraciesia kulnuć ź siabrami kufal-druhi. Ale pamiatajcie, što zanadta, toje nie dobra. Piva heta ałkaholny napoj, i złoŭžyvańnie im moža ŭščent pierakreślić asałodu ad smaku i vodaru.
Praviły pavodzinaŭ dehustataraŭ
1. Nie palić, nie jeści, nie pić kavu, mocnyja napoi, nie karystacca parfumaj.
2. Zasiarodzić uvahu tolki na pivie.
3. Nie vydavać svajo staŭleńnie padčas dehustacyi.
Patrabavańni da piva
Piva ź ladoŭni, jakim tak pryjemna aśviažycca ŭ śpioku, achałodžana da 8 °S. Ale vodary lepš raskryvajucca ŭ ciopłym pivie. Idealnaja tempieratura dla dehustacyi - + 12-14 °S.
Dehustujem pravilna: pakrokavaja instrukcyja
1. Niuchajem
2. Nabirajem u rot
3. Hłytajem
4. Adčuvajem kancavy smak.
5. Pamiž sieryjami pałoščam rot vadoj, možna karystacca suchimi zakuskami biez smaku.
***
Piva ŭ Biełarusi
Adzin z najbolš staražytnych napojaŭ. Jašče 6 tysiač hadoŭ tamu jaho varyli šumiery. Słabaałkaholny napoj, jaki vyrablajecca śpirtavym zakisańniem soładavaha susła z dapamohaj piŭnych droždžaŭ, zvyčajna ŭ prysutnaści chmiela. Utrymańnie ałkaholu ŭ bolšaści hatunkaŭ piva — 3—6%. Pik spažyvańnia piva ŭ našych prodkaŭ prychodziŭsia na kastryčnik-listapad, kali zapasy zbožža dazvalali ŭ tym liku nazapasić i soład na zimu. Uviesnu ž z apošnich zapasaŭ soładu varyli «marcovaje» piva. A voś uletku piva amal nie ŭžyvali.
Ad Redakcyi. Nahadvajem, što praźmiernaje ŭžyvańnie ałkaholu čynić škodu vašamu zdaroŭju
