Čatyry adnolkavyja damy pa vulicy Pijanierskaj u Minsku zakrytyja ad vačej minčukoŭ ścianoj zabaŭlalnaha centra, jaki naležyć Juryju Čyžu.
Susiedstva z «Arena-Sici» naŭrad ci daspadoby haspadaram elitnaha žylla. Kuplajučy svaje kvatery, jany raźličvali bačyć za voknami źziańnie praśpiekta Pieramožcaŭ, a nie hruzaviki, jakija zavoziać pradukty ŭ «Prastor».
Admietnaść damoŭ — zakrytaja pa pierymietry ŭnutranaja placoŭka. Dzieci hulajucca za nievysokim płotam, nichto čužy da ich nie padbiarecca, chiba što praz padziemny parkinh. Kožnamu haspadaru vydzielenaja prastora na stajancy, a niekatorym i pa dva miescy.
Pryvatnyja damy ad «svajho» zabudoŭščyka
Damy źjavilisia ŭ kancy 2000-ch, zabudoŭščykam byŭ «Trest Prambud». Heta kampanija, jakaja ŭ svoj čas paŭstała ŭ ščylnym supracoŭnictvie ź dziaržaŭnym «Minskbudam», ale farmalna źjaŭlajecca zakrytym akcyjaniernym tavarystvam.
Hałoŭnym prajektam «Tresta Prambud» była zabudova rajona Drazdy katedžami dla łukašenkaŭskich čynoŭnikaŭ. Hienieralnamu dyrektaru kampanii Viktaru Mazoŭku i samomu dazvolili pasialicca pamiž ministraŭ. Damy pa Pijanierskaj znachodziacca jakraz praz darohu ad tych namienkłaturnych kvartałaŭ.
Kvatery tut zajmieli mnohija biełaruskija biznesmieny, a taksama spartsmieny.
U 2008 hodzie barysaŭski BATE ŭpieršyniu trapiŭ u Lihu čempijonaŭ, a tamu hulcy i treniery masava ŭkładali atrymanyja pryzavyja hrošy ŭ nieruchomaść.
Nijakich ilhotnikaŭ tut niama, haspadary nabyvali žyllo ŭ «Tresta Prambuda» pa kamiercyjnaj canie. Ale cikavaść vyklikaje tolki niekalki kvater.
Vializnaja trochpakajoŭka ahulnaj płoščaj 114 m2 naležyć Uładzimiru Andrejčanku, jaki raniej kiravaŭ Viciebskaj vobłaściu, ale ŭžo šosty hod uznačalvaje pałatu pradstaŭnikoŭ.
fota Tut.by
Na kuplu kvatery jamu mahło b chapić stabilna vysokaha zarobku. Raz na čatyry hady, bałatujučysia ŭ parłamient, Andrejčanka publikuje svaju dekłaracyju ab dachodach. Dyk voś, u 2007, jašče ŭ statusie viciebskaha hubiernatara, jon u siarednim mieŭ pa $2100 za miesiac. A ŭ 2011 Andrejčanka-śpikier zadekłaravaŭ štomiesiačnyja $2250. Dva dziesiacihodździ na vysokich pasadach dazvolili b jamu adkłaści hrošy faktyčna na luboje žyllo ŭ Biełarusi.
Adnak, pavodle dadzienych Nacyjanalnaha kadastravaha ahienctva, svaju elitnuju kvateru Andrejčanka… pryvatyzavaŭ! Jašče ŭ kastryčniku 2010 hoda.
Słužbovaje žyllo dla elity
U 1999 Alaksandr Łukašenka padpisaŭ ukaz №286 «Ab stvareńni śpiecyjalnaha słužbovaha žyllovaha fondu».
U im byŭ składzieny śpis čynoŭnikaŭ, jakija mahli pretendavać na słužbovaje žyllo na čas pracy ŭ dziaržaŭnych orhanach «u metach zabieśpiačeńnia naležnych umoŭ dla vykanańnia imi słužbovych abaviazkaŭ, zabieśpiačeńnia ich biaśpieki i achovy dziaržaŭnych sakretaŭ».
U respublikanski śpis trapili kala dvaccaci pasadaŭ (ad prezidenta da staršyni Nacbanka), a taksama deputaty abiedźviuch pałataŭ parłamienta.
Andrejčanka moh pretendavać na takoje słužbovaje žyllo i kali kiravaŭ Viciebščynaj, i kali pierajechaŭ u parłamient. Dla deputataŭ z rehijonaŭ u Minsku vydzielenyja dva damy kala vulicy Čyrvonaarmiejskaj na bierazie Śvisłačy. Ale pasialić «narodnych vybrańnikaŭ» mahli i ŭ luboj inšaj svabodnaj słužbovaj kvatery. Ci mahła pryvatyzavanaja kvatera Andrejčanki być «deputackaj»?
U zakonie «Ab pryvatyzacyi žyllovaha fondu», jaki dziejničaŭ na terytoryi krainy ad 1992 da 2013 hoda (letaś jon straciŭ siłu paśla źjaŭleńnia Žyllovaha kodeksa), adnaznačna skazana:
žyłyja pamiaškańni śpiecyjalnaha słužbovaha žyllovaha fondu nie padlahajuć pryvatyzacyi.
Cana — $400 tysiač
«Pryvatyzacyja» kvatery aznačaje, što raniej jana była dziaržaŭnaj. Ale adkul uziałasia dziaržaŭnaja kvatera ŭ pryvatnym domie?
Jak tłumačać jurysty, usie zabudoŭščyki pieradajuć niekalki kvater u pabudavanym domie municypalnym uładam. Hetuju nieruchomaść zvyčajna prapanujuć tym, čyjo žyllo pajšło pad znos. Mahčyma, kvatera Andrejčanki trapiła ŭ dziaržaŭnuju ŭłasnaść mienavita pa takoj schiemie. Ale i ŭ takim vypadku śpikier nie moh pretendavać na jaje atrymańnie.
U dakumientach Nacyjanalnaha kadastravaha ahienctva nie ŭdakładniajecca, była pryvatyzacyja płatnaj ci biaspłatnaj.
Zatoje možna padličyć ciapierašni pryblizny košt žylla Andrejčanki. Na prodaž vystaŭlenyja ź dziasiatak kvater u hetym i susiednich damach. Kvadratny mietr u ich kaštuje ad $2800 za hołyja ścieny da $5000 za dyzajnierski ramont.
Navat kali ŭziać siaredniuju canu, to pryvatyzavanaja trochpakajoŭka Andrejčanki kaštuje bolš za $400 tysiač.
* * *
U listapadzie 2011 hoda Andrejčanka atrymaŭ ad Minharvykankama jašče i ziamlu pad budaŭnictva katedža ŭ Viaśnincy, heta 1 km ad svajoj kvatery ŭ Drazdach.
* * *
Uładzimir Andrejčanka naradziŭsia ŭ 1949 u vioscy Marjanava Loźnienskaha rajona. Skončyŭ Łužaśnianski sielhastechnikum (1968), Vielikałucki sielskahaspadarčy instytut (1977), Minskuju vyšejšuju partyjnuju škołu (1988). Paśla słužby ŭ vojsku pracavaŭ ahranomam. U 1972—1975 — instruktar u Loźnienskim rajkamie kamsamoła, a paśla ŭ rajkamie KPB. U 1975—1978 — sakratar partkama saŭhasa «Adamienka», u 1978—1981 — staršynia kałhasa imia Danukałava Loźnienskaha rajona. U 1981—1985 — načalnik upraŭleńnia sielskaj haspadarki Loźnienskaha rajvykankama, u 1985—1987 — staršynia rajvykankama. U 1987—1991 hadach — staršynia Vierchniadźvinskaha rajsavieta, pieršy sakratar Vierchniadźvinskaha rajkama KPB. U 1991—1994 — namieśnik staršyni Viciebskaha abłvykankama pa sielskaj haspadarcy, u 1994—2008 — staršynia Viciebskaha abłvykankama. Z 2008 — staršynia pałaty pradstaŭnikoŭ.
