Ciapierašnija pieramovy z Rasijaj nakiravany na dasiahnieńnie miru va Ukrainie, ale ab paŭnavartasnaj narmalizacyi adnosin z Rasijaj kazać pakul nie davodzicca, uličvajučy situacyju z Krymam.
Pra heta zajaviŭ prezident Ukrainy Piatro Parašenka na siesii Parłamienckaj Asamblei Rady Jeŭropy (PARIE) u Strasburhu ŭ čaćvier.
«Bieź viartańnia Kryma narmalizacyja našych adnosinaŭ niemahčymaja. Ale my ludzi miru. Dla hetaha ŭkrainskaja ŭłada, i ja, jak prezident, vystupili ź mirnym płanam», — skazaŭ jon.
Kiraŭnik ukrainskaj dziaržavy nahadaŭ, što pa vynikach praviedzienych napiaredadni telefonnych kansultacyj z prezidentam Rasii Uładzimiram Pucinym, prezidentam Francyi Fransua Ałand i kancleram Hiermanii Anhiełaj Mierkiel rasijski prezident padtrymaŭ jaho mirny płan.
Pry hetym Parašenka adznačyŭ, što Kijeŭ čakaje takoj padtrymki nie na słovach, a na spravie.
«I my čakajem hetych dziejańniaŭ. Uzmacnicie achovu miežaŭ, spynicie nielehalny patok techniki, pierastańcie rekrutavać najmitaŭ, narešcie, adviadzicie vojski», — zaklikaŭ ukrainski prezident svajho rasijskaha kalehu.
