ministry zamiežnych spraŭ Rasii i Ukrainy Siarhiej Łaŭroŭ i Pavieł Klimkin, fota Reuters.com
Ministry zamiežnych spraŭ Ukrainy, Rasii, Hiermanii i Francyi, što sustrakalisia ŭ Bierlinie pa inicyjatyvie Hiermanii, uzhadnili pakiet mier pa ŭrehulavańni situacyi va Ukrainie.
«Možna skazać, što meta dasiahnuta», — cytuje Reuters ministra zamiežnych spraŭ Francyi Łarana Fabijusa.
U pryvatnaści, baki damovilisia ab nieabchodnaści terminova ŭzhadnić ŭmovy pieramirja i ŭ bližejšy čas sklikać kantaktnuju hrupu dla abmierkavańnia hetaha pytańnia, paviedamiŭ rasijski ministr zamiežnych spraŭ Siarhiej Łaŭroŭ.
«Jość vyraznaja prychilnaść dvuchbakovamu spynieńniu ahniu», — skazaŭ paśla ekstranaj sustrečy ŭ stalicy Hiermanii niamiecki ministr zamiežnych spraŭ Frank-Valter Štajnmajer.
Pry hetym kiraŭnik ukrainskaha MZS Pavieł Klimkin padkreśliŭ, što heta mahčyma tolki pry vykanańni mirnaha płana, prapanavanaha Piatrom Parašenkam.
Udzielniki sustrečy syšlisia na tym, što sačyć za ŭrehulavańniem situacyi pavinna ABSIE.
Akramia taho, ministry padtrymali ideju adpravić na rasijskija pamiežnyja punkty naziralnikaŭ ad arhanizacyi.
«Tolki kali zacichnuć aŭtamaty, paśla padpisańnia paŭnavartasnaha pahadnieńnia ab spynieńni ahniu, stanie mahčymym abmierkavańnie vyrašeńnia kryzisu», - skazaŭ niamiecki ministr zamiežnych spraŭ Frank-Valter Štajnmajer pierad pačatkam sustrečy.
Kancler Niamieččyny Anhieła Mierkiel, jakaja nieadnarazova pravodziła pieramovy z prezidentam Rasii Uładzimiram Pucinym padčas ŭkrainskaha kryzisu, paabiacała «nie spyniacca ŭ dasiahnieńni dypłamatyčnaha vyrašeńnia kanfliktu».
«Ale my jašče dalokija ad mety», - skazała jana, vykazaŭšy škadavańnie ab parušeńni režymu spynieńnia ahniu z boku sieparatystaŭ.
Jana nie vyklučyła mahčymaść uviadzieńnia bolš žorstkich sankcyj u dačynieńni da Maskvy.
