Punkty propusku na biełaruska-polskaj hranicy «Damačava — Słavatyčy» i «Piasčatka — Połaŭcy» ŭ bližejšy čas źmieniać svoj status i śpiecyjalizacyju.
Ab hetym pa vynikach rabočaj sustrečy kiraŭnikoŭ mytnych słužbaŭ Biełarusi i Polščy, jakaja adbyłasia ŭ aŭtamabilnym punkcie propusku «Kazłovičy», paviedamiŭ načalnik upraŭleńnia arhanizacyi mytnaha kantrolu Dziaržaŭnaha mytnaha kamiteta Biełarusi Uładzimir Arłoŭski.
«U punkcie propusku «Damačava - Słavatyčy» hruzavyja transpartnyja srodki ahulnaj masaj da 7,5 t ciapier prapuskajucca ŭ režymie ekśpierymienta. Nami ŭžo atrymana nota polskaha boku ab źmianieńni śpiecyjalizacyi hetaha punkta propusku. Paśla adpraŭleńnia takoj noty biełaruskim bokam afarmleńnie takich hruzavikoŭ u punkcie propusku «Damačava - Słavatyčy» budzie ažyćciaŭlacca na pastajannaj asnovie», - paviedamiŭ Uładzimir Arłoŭski. Hetak ža paśla zakančeńnia rekanstrukcyi źmienicca śpiecyjalizacyja punkta propusku «Piasčatka - Połaŭcy». Budzie źmienieny jaho status ź miždziaržaŭnaha na mižnarodny. Praz hety punkt propusku zmohuć ruchacca transpartnyja srodki nie tolki Biełarusi i Polščy, ale i inšych krain. Źmianić status płanujecca da kanca 2014 — pačatku 2015 hoda.
Heta robicca dla taho, kab razhruzić dziejučyja punkty propusku. Asnoŭny napramak tranzitnaha hruzapatoku — «Kazłovičy — Karoščyn» — pierahružany. Na ŭjezd u Biełaruś za sutki tut prapuskajuć 1000—1150 hruzavikoŭ. Heta najbujniejšy punkt propusku ŭ Jeŭropie. Anałahaŭ jamu niama i ŭ Mytnym sajuzie. Kab źnizić nahruzku na jaho, było pryniata rašeńnie nakiravać hruzaviki ahulnaj masaj da 7,5 t na inšyja napramki. U «Damačava» paśla rekanstrukcyi stvorany ŭsie ŭmovy dla afarmleńnia aŭtapajazdoŭ. Adzinaje, što strymlivaje raźvićcio napramku, heta darožnaja infrastruktura z polskaha boku. U sutki tut afarmlajecca kala 50 hruzavych aŭtamabilaŭ.
Pavodle słoŭ Uładzimira Arłoŭskaha, intensiŭnaść hruzapatoku pa ŭsioj biełaruska-polskaj hranicy ciapier pieravyšaje normy, ustanoŭlenyja prajektnaj mahutnaściu punktaŭ propusku. U čas rabočaj sustrečy abmiarkoŭvałasia mahčymaść pavieličeńnia prapusknoj zdolnaści punktaŭ propusku ŭ tym liku za košt vyrašeńnia technałahičnych pytańniaŭ. U suviazi z hetym kiraŭniki mytnych słužbaŭ pryniali rašeńnie ab stvareńni rabočaj hrupy pa arhanizacyi abmienu infarmacyjaj ab tavarach, jakija pieramiaščajucca praz mytnyja hranicy sumiežnych dziaržaŭ. «Na praciahu hoda hrupa prapracuje ŭsie hetyja pytańni. Heta daść mahčymaść chutčej pryniać rašeńni ab praviadzieńni abo niepraviadzieńni jakich-niebudź apieracyj mytnaha kantrolu i ŭ kančatkovym vyniku paskoryć praces pierasiačeńnia hranicy», - adznačyŭ načalnik upraŭleńnia arhanizacyi mytnaha kantrolu.
Na sustrečy abmiarkoŭvalisia i pytańni arhanizacyi piešachodnaha ruchu praz punkty propusku. Polski bok padzialiŭsia vopytam uładkavańnia śpiecyjalnych darožak dla ruchu piešachodaŭ u punkcie propusku «Kuźnica — Bruzhi». Hety vopyt cikavy biełaruskamu boku, pakolki takaja pierśpiektyva praduhledžana i ŭ punkcie propusku «Piasčatka - Połaŭcy» paśla zaviaršeńnia jaho rekanstrukcyi. Adzinaja ŭmova - ruch praz hranicu jak dla transpartnych srodkaŭ, tak i dla ludziej pavinien być kamfortnym i biaśpiečnym.
U čas dvuchbakovaj sustrečy staršynia DMK Biełarusi Alaksandr Špileŭski i namieśnik ministra finansaŭ, hienieralny dyrektar mytnaj słužby Polščy Jacek Kapica razhledzieli ceły błok pytańniaŭ uzajemadziejańnia i supracoŭnictva, źviazanych z paskareńniem prachodžańnia hranicy i spraščeńniem ažyćciaŭleńnia mytnych apieracyj. Ich vyrašeńnie, na dumku bakoŭ, u bližejšaj pierśpiektyvie pavinna dać stanoŭčy vynik.
