Kala miažy Rasii i Ukrainy źbity pasažyrski samalota «Boinh-777» małajzijskaj avijakampanii.
Łajnier vykonvaŭ rejs Amsterdam—Kuała-Łumpur. Samalot upaŭ za 80 kiłamietraŭ ad Daniecka.
«Łajnier upaŭ niedaloka ad nasielenaha punkta Śniežnaje, pablizu ad Daniecka, dzie iduć bai», — paviedamiła krynica «Interfaksa».
Na borcie znachodziłasia 280 pasažyraŭ i 15 členaŭ ekipaža. Udakładniajecca, što samalot lacieŭ na vyšyni 10 kiłamietraŭ.
«Ukrainskaja praŭda» śćviardžaje, što samalot byŭ źbity. Vydańnie piša, što raniej sieparatysty atrymali zbroju, jakoj možna źbivać samaloty na vialikaj vyšyni.
Jašče da taho, jak stała viadoma pra trahiedyju z pasažyrskim łajnieram, sieparatysty zajavili, što źbili transparty samalot ukrainskich siłavikoŭ. Infarmacyja pra heta źjaviłasia ŭ supołcy «Zvodki Strałkova» ŭ sacyjalnaj sietcy «Ukantakcie», a taksama na rasijskim partale Lifenews.
«Papiaredžvali ž — nie latać u našym niebie», — nibyta zajaviŭ lidar sieparatystaŭ Ihar Strałkoŭ.
Paźniej hetaje paviedamleńnie źnikła z staronki Strałkova,
zamiest jaho źjaviłasia inšaje, u jakim jon admaŭlaje datyčnaść bajevikoŭ «DNR» da źbićcia «Boinha».
Na borcie samalota było 280 pasažyraŭ, siarod jakich 80 dziaciej, i 15 členaŭ ekipaža.
Pra heta paviedamlaje Jesprieso.TV sa spasyłkaj na krynicu va ŭzbrojenych siłach Ukrainy. «Źbić samalot z mabilnaha PZRK, u pryvatnaści PZRK «Ihła» niemahčyma, dla hetaha patrebnyja jak minimum zienitnyja sistemy «Buk», — kaža krynica.
Pa słovach krynicy, ahoń pa łajniery vioŭsia z rajona, zaniataha terarystami i rasijskimi najmitami -
ukrainskich sił SPA i ŭkrainskich vojskaŭ tam niama. U toj ža čas, niedaloka ad maršrutu łajniera pralahaŭ maršrut ukrainskaha vajskova-transpartnaha Ił-76, jaki nakiroŭvaŭsia dla skidu hruzaŭ błakavanym ukrainskim vojskam. Pradstaŭnik Minabarony Ukrainy ličyć, što rasiejskaja SPA dała celeŭkazańnie na źniščeńnie ŭkrainskaha samalota, ale ŭ vyniku pamyłki rakietny ŭdar byŭ naniesieny pa cyvilnym avijałajniery.
Radnik ministra ŭnutranych spravaŭ Ukrainy Anton Hieraščanka śćviardžaje, što terarysty majuć abstalavańnie, zdolnaje źbivać samaloty na vialikaj vyšyni.
Samalot byŭ źbity «z łaskava pieradadzienaha Pucinym zienitna-rakietnaha kompleksu «Buk», - piša jon u svaim Fejsbuku.
Pa słovach A.Hieraščanki, u čaćvier ranicaj miascovyja žychary zafiksavali pierasoŭvańnie kompleksu «Buk» z boku Tareza ŭ Śniežnaje.
Prezident Ukrainy Piatro Parašenka ad imia dziaržavy vykazaŭ hłybokija i ščyryja spačuvańni siemjam i blizkim zahinułych, paviedamlaje UNIAN. Ažyćciaŭlajucca ŭsie mahčymyja pošukava-vyratavalnyja mierapryjemstvy, adznačyŭ jon.
Prezident Ukrainy inicyjuje stvareńnie Dziaržaŭnaj kamisii z pryciahnieńniem śpiecyjalistaŭ ICAO (Mižnarodnaj arhanizacyi hramadzianskaj avijacyi — International Civil Aviation Organization) i inšych mižnarodnych struktur dla rasśledavańnia trahiedyi z samalotam Boinh-777 ŭ Danieckaj vobłaści.
Jak padkreśliŭ Parašenka, za apošnija dni heta ŭžo treci trahičny vypadak paśla taho, jak z rasijskaj terytoryi byŭ źbity samaloty An-26 i Su-25 Uzbrojenych sił Ukrainy. «My nie vyklučajem, što hety samalot taksama byŭ źbity, i padkreślivajem, što Uzbrojenyja siły Ukrainy nie ździajśniali nijakich dziejańniaŭ pa paražeńnie celaŭ u pavietry», - adznačyŭ jon.
Miascovyja žychary paviedamlajuć, što sa źbitaha samalota vypała bolš za dziesiatak ciełaŭ.
Ab hetym paviedamlajecca na staroncy «Jeŭramajdanu» u Fejsbuku. «Voś što pišuć miascovyja žychary: «Telefanavali svajaki ź siała Rassypnoha: sa źbitaha samalota vypała bolš za dziesiatak trupaŭ azijackaha vyhladu (vjetnamcy ci kitajcy) biez adzieńnia. Abłomki i trupy ŭpali na pryvatny siektar pasiołka, i kala balnicy. Ludzi ŭ vajennaj formie źbirajuć i vyvoziać trupy».
