Prapanujem uvazie čytačoŭ «NN» frahmient intervju z namieśnikam ministra suviazi Rasii Alaksiejem Volinym datyčna prajavaŭ prapahandy ŭ ŚMI. U hutarcy biaruć udzieł hałoŭny redaktar telekanała «Dožd́» Michaił Zyhar, telekarespandenty kanała Lika Kremier i Anton Žałnoŭ.
Zyhar: Alaksiej Kanstancinavič, vielmi cikava, Vy skazali pra rasiejskaje telebačańnie i pieraličyli kanały, jakimi Vy možacie hanarycca. Niemahčyma nie ŭzhadać u źviazku z hetym adnu z apošnich navinaŭ, skandał, jaki vyklikaŭ niadaŭni repartaž u efiry Pieršaha kanała, kali Pieršy kanał pakazaŭ intervju z uciakačkaj z Słavianska pa imieni Halina Pyšniak, jakaja raspaviała pra toje, što nibyta ŭ horadzie Słaviansk ŭkryžavali trochhadovaha chłopčyka. Hetaja infarmacyja była šmatkroć abvierhnutaja ŭsimi rasiejskimi žurnalistami, jakija pracavali ŭ hetym horadzie, i ŭsimi suśvietnymi žurnalistami, usimi žycharami horada, jakija ni da, ni paśla nie bačyli takoha faktu. Tym nie mienš, heta ni razu nie było abviernuta Pieršym kanałam, nijakich vybačeńniaŭ nie było pryniesiena. Na dumku mnohich pradstaŭnikoŭ žurnalisckaha cechu, heta roŭna ŭkładvajecca ŭ toje, pra što Vy kazali, što adbyvajecca zaniapad žurnalisckaha prafiesijanalizmu i jakaści žurnalisckaj dziejnaści. Jak Vy aceńvajecie hety skandał, ci pavinny panieści niejkaje pakarańnie tyja ludzi, jakija majuć da hetaha dačynieńnie?
Volin: Vam chočacca, kab Vašyja kalehi panieśli pakarańnie?
Zyhar: Nam chočacca pieradusim Vašuju pazicyju pačuć.
Volin: Maja pazicyja – usio narmalna. Pieršy kanał braŭ intervju, jon pakazaŭ toje, što skazali ŭ intervju. Heta całkam adpaviadaje ŭsim normam, praviłam i kryteram žurnalisckaj etyki. Jość čałaviek, jon kaža. Sinchron dali…
Kremer: Vy ž nie budziecie admaŭlać, što my zaraz znachodzimsia ŭ situacyi davoli surjoznaj miedyjnaj ahresii apošnija kolki miesiacaŭ. Zhodnyja?
Volin: Tak. Bolš za toje, my znachodzimsia ŭ situacyi vielmi surjoznaj miedyjnaj ahresii, i my znachodzimsia ŭ situacyi dosyć niecyvilizavanych mietadaŭ viadzieńnia infarmacyjnaha supraćstajańnia, u značnaj stupieni toje adbyvajecca z boku našych partnioraŭ. Havorka idzie, pierš za ŭsio, pra biesprecedentnyja rečy, kali žurnalistaŭ sprabujuć ŭklučyć u niejkija sankcyjnyja śpisy, abmiažoŭvajuć ich svabodu pieramiaščeńnia, zabaraniajuć im pryjezd u inšyja krainy…
Kremer: To bok nahniatać nieabchodna?
Volin: Vy nazyvajecie heta nahniatańniem, a heta nazyvajecca, pa vialikim rachunku, narmalnaja žurnalisckaja emocyja.
Kremer: A žurnalisckaja emocyja ad prapahandy jak adroźnivajecca?
Volin: Vielmi prosta. Prapahanda palahaje ŭ tym, što vy izalujecie hramadstva ad lubych alternatyŭnych punktaŭ hledžańnia i ŭdzioŭbvajecie hetamu hramadstvu tolki svajo hledzišča. Zaraz nijakaj prapahandy ŭ hetym dačynieńni niama, tamu što kolkaść mierkavańniaŭ vielmi raznastajnaja i vielmi vialikaja… Kali my pasprabujem zaniać vielmi adciahnienuju situacyju datyčna taho, što adbyvajecca va Ukrainie, dyk naš hladač kanał nie zrazumieje, i kanał stracić u rejtynhu. I ŭ Pieršaha kanała zrobicca taki ž rejtynh, jak u kanała «Dožd́», čaho Pieršy kanał nie choča, tamu što heta budzie bankructva Pieršaha kanała.
Žałnoŭ: A toje, što dobraachvotniki, jakich my nazyvajem ci Vy nazyvajecie dobraachvotnikami, pahladzieŭšy siužety dziaržaŭnaha telebačańnia, zapisvajucca ŭ šerahi, iduć vajavać, ich truny potym viartajucca na radzimu – heta Vy taksama nazyvajecie narmalnym aśviatleńniem chady padziejaŭ?
Volin: Vy tolki što sami skazali, što kali ludzi bačać, jakaja adbyvajecca niespraviadlivaść, u ich uźnikaje narmalnaje čałaviečaje žadańnie – u vielmi mnohich – pryniać udzieł u likvidacyi hetaj niespraviadlivaści. Treba nie kazać pra toje, što adbyvajecca va Ukrainie? Čamu Vy ličycie, što mienavita praz toje, što jany pahladzieli siužet na tym ci inšym dziaržaŭnym kanale… Ja chaču skazać, što tyja rejtynhi, jakija demanstrujuć našy viadučyja kanały, pakazvajuć, što hramadstva akurat usprymaje mienavita tuju padaču materyjału, mienavita taki ton, jaki zaniali našyja viadučyja televizijnyja kanały. I nievypadkova, kali my pahladzim na rejtynhi i doli, my bačym, što doli navinavych pieradač na viadučych rasiejskich kanałach za apošnija kolki miesiacaŭ pavialičylisia praktyčna ŭdvaja … U nas na praciahu hetych miesiacaŭ adbyŭsia ŭ značnaj stupieni navat adtok publiki ź internetu da telebačańnia. Apytańni hramadskaj dumki pakazvajuć, što vielmi vialikaja kolkaść ludziej stała vykarystoŭvać telebačańnie jak asnoŭnuju krynicu atrymańnia infarmacyi ab navakolnym śviecie, a nie internet, što ŭ vielmi mnohich było raniej.
Žałnoŭ: A z telekanałaŭ chto daje alternatyŭny punkt hledžańnia, na Vašu dumku?
Volin: Z ahulnadastupnych, napeŭna, nichto mocna alternatyŭny punkt hledžańnia nie daje, chacia b z taje pryčyny, što jany dumajuć pra svoj rejtynh… Toj kanał abo toje ŚMI, jakoje siońnia zojmie nie patryjatyčnaje hledzišča, prosta apyniecca ekanamična niaŭdałym, tamu što ad jaho advierniecca aŭdytoryja.
Zyhar: Prabačcie, ja, zdajecca, krychu zabłytaŭsia ŭ terminach. Vas pytalisia pra alternatyŭnaje, a vy skazali pra niepatryjatyčnaje. Heta značyć, alternatyŭnaje hledzišča – jano apryjory niepatryjatyčnaje?
Volin: U hetym niama ŭ mianie ni najmienšaha sumnievu.
