Z 17 lipienia ŭ kinateatrach Biełarusi źjaviłasia novaja častka «Płaniety małpaŭ».
Historyja hetaj franšyzy — a heta ŭžo vośmy film sieryi — adlustravańnie fobij čałaviectva. Jak i pieršyja častki, novy pierazapusk parazituje na najbolš mocnych strachach cyvilizavanaha śvietu.
Šaścidziesiatyja hady, kali byli źniatyja pieršyja stužki, — heta časy honki ŭzbrajeńniaŭ, «Chałodnaj vajny», jadziernych vyprabavańniaŭ u abiedźviuch zvyšdziaržavach, palota čałavieka ŭ kosmas i vysadki na Miesiac. Tamu asnoŭnyja tryvohi byli źviazanyja ź jadziernaj vajnoj dy rospačču pierad biaskoncaściu suśvietu.Siužet aryhinalnaj historyi Płaniety Małpaŭ vydatna adlustroŭvaŭ heta: kamanda astranaŭtaŭ vysadžvajecca na płaniecie, zasielenaj razumnymi małpami i dzikimi ludźmi, što pakłaniajucca jadziernaj bombie i z žacham uśviedamlaje, što heta jość Ziamla praz 2 tysiačy hod. U svoj čas hetaja historyja zabiaśpiečyła šalony pośpiech filma.
Sučasnyja stužki vydatna pakazvajuć novyja tryvohi sasłabłaha čałaviectva: tatalnaja ipachondryja, paničnaja bojaź virusaŭ (uzhadajcie tolki, kolki histeryj było źviazana apošnija hady z roznaha kštałtu hrypami i pnieŭmanijami), a taksama rospač i žach pierad chvalami dzikich mihrantaŭ, jakija, nibyta, zapałanili Jeŭropu dy Amieryku.
Mienavita na strachach ludziej pierad epidemijami i bojaźziu našeścia dzikich i mocnych čužyncaŭ i sprabuje zhulać novy film. Pakul heta atrymlivajecca davoli ŭdała: užo pieršy ŭikend prynios stvaralnikam «Płaniety Małpaŭ» kala 100 miljonaŭ dalaraŭ.
