«Nikoli nie bačyŭ, kab u Biełarusi tak nie lubili ruskich!» — usklikaje 23-hadovy Miša, jaki dasłaŭ u redakcyju fatahrafii svajho pakarabačanaha Mersedes.
Miša, choć i biełarus, ale niamała pracavaŭ u Rasii, lubić hetuju krainu, asabliva za hulniu zbornaj pa chakiei. U znak asablivaha staŭleńnia jeździć z rasijskaj simvolikaj «na borcie». U apošni čas hetuju simvoliku stali zryvać, a mašynu — niaviečyć. Z takoj ža ahresijaj sutykajucca ŭ Minsku i rasijanie.
Viečaram 20 lipienia Miša ŭbačyŭ svaju paškodžanuju mašynu na stajancy kala Parku Horkaha. «Byli prabityja dva bakavyja koły. Na šynamantažy mnie skazali, što ŭ kołach —try dzirki šyłam zrabili. U mianie mašyna jarkaja. Ściažki rasijskija na kapocie, pa bakach nalepki ŭ koler ściaha rasijskaha. Ich taksama šyłam ździrali.
Na šynamantažy navat nie ździvilisia, raspaviali, što ja nie pieršy taki. Majstar raspavioŭ, što da nas čałaviek na ruskich numarach pryjazdžaŭ z takimi ž tryma dzirkami, adzin u adzin. Toj klijent, akazałasia, pryjechaŭ łatać dzirki, a na nastupny dzień jamu jašče raz prabili, i jon znoŭ byŭ vymušany jechać mianiać šyny,
— raspavioŭ Miša. U paniadziełak jon napisaŭ zajavu ŭ Partyzanski RUUS Minska.
Sproba sadrać nalepku z trykałoram z adnych dźviarej…
I z druhich…
Małady čałaviek — biełarus, adnak šmat času pracavaŭ u Rasii, tam u jaho šmat svajakoŭ. Jon i jaho baćki ličać, što vandalizm u dačynieńni da mašyn z rasijskaj simvolikaj źviazany z padziejami va Ukrainie.
«Kažuć, što zaraz ruskich nie lubiać. A čaho nie lubić? Pravilna, jany padtrymlivajuć svajho prezidenta. Ale navat kali vy chočacie padtrymać Ukrainu, to padtrymka Ukrainy nie pavinna vyjaŭlacca ŭ tym, kab zrabić inšamu narodu drenna. Heta nie padtrymka. Padtrymka — heta źviarnucca da dziaržavy. Źviartajciesia da Pucina! Navošta vy ruskim robicie drenna? Ja ŭvohule zaŭziatar, ja nie nacyjanalist. Ja nie lezu ŭ palityku! — kaža Miša.
Miescy prakołaŭ paznačanyja krejdaj.
Na jaho dumku, pytańni palityčnyja pavinny vyrašać na ŭzroŭni ŭradaŭ i prezidentaŭ, a nie na ŭzroŭni prostych ludziej. «Niachaj urady vyrašajuć, chto tam kamu pavinien, chto vinavaty i h.d. — kaža małady čałaviek, dadajučy, što «raniej takoha ŭ Biełarusi nikoli nie było».
«Ja nie dumaŭ, što takoje staŭleńnie da ruskich u nas naohuł moža być, choć pieršaja «łastaŭka» była ŭ traŭni», — kaža Miša. Mienavita padčas čempijanatu śvietu pa chakiei jon upieršyniu ŭbačyŭ ahresiju ŭ adnosinach da rasijskaj simvoliki.
Tady Miša raspaviadaŭ, što ŭ adzin ź viečaroŭ vymušany byŭ chavacca ŭ mašynie, bo jaho ledź nie pabili. Akramia taho, z mašyny sarvali ŭsie rasijskija ściahi.
Ale zajavu ŭ milicyju jon napisaŭ tolki paśla apošniaha vypadku: «Ja baču, što hetaje chulihanstva stanovicca rehularnymi», — kaža jon.
Miša kaža, što i dalej budzie jeździć z rasijskaj simvolikaj.
U siaredzinie traŭnia šyny ŭ mašynie z rasijskimi numarami prabili supiermadeli Kaciarynie Damańkovaj.
Jana ŭbačyła la padjezda svaju mašynu z prabitymi šynami i pabitym škłom. Pobač stajali mašyny ź biełaruskimi numarami, jakija nie paciarpieli.
«Što heta, ludzi? Adkul u vas stolki nianaviści? Čamu z-za takich vyradkaŭ ja pavinna siabie adčuvać niebiaśpiečna ŭ majoj Biełarusi? Hetaja kraina nie dla padonkaŭ. <…> Mianie vyrašajuć pakarać za toje, što ja źviazanaja z Rasijaj. Tak budźcie vy nie źviazanyja ź joj 1000 razoŭ! Vaša pakarańnie ŭžo hrukajecca da vas u dźviery ŭ vyhladzie baradataj «žančyny» - pisała tady madel u svaim Instagram.
Jašče adzin małady čałaviek — 28-hadovy Michaił — niekalki hadoŭ tamu pryjechaŭ u Biełaruś z Rasii. Ciapier u jaho biełaruski pašpart, a na mašynie choć i biełaruskija numary, simvolika — rasiejskaja. U toj ža dzień, što i 23-hadovy Miša, jon vyjaviŭ dzirku ad kuli ŭ łabavym škle. «Upieršyniu takoje baču, — kaža Michaił. — Nikoli ŭ Biełarusi nie było raniej takoj varožaści».
