Jeŭrapiejski humanitarny univiersitet (EHU) skončyŭ adbor asnoŭnaha vykładčyckaha składu, havorycca ŭ raspaŭsiudžanym 29 lipienia paviedamleńni administracyi VNU.
Na pieršym etapie byŭ praviedzieny adkryty konkurs na zamiaščeńnie 17 vykładčyckich pasad pa pryncypu poŭnaj zaniataści z zaklučeńniem pracoŭnych damovaŭ na piać hadoŭ. Na druhim — pracoŭnyja damovy terminam na hod buduć zaklučanyja z 61 vykładčykam.
Administracyja VNU adznačaje, što univiersitetu nieabchodna budzie štohod układvać dadatkovyja srodki, kala 900.000 jeŭra, pry naličeńni zarobkaŭ vykładčyckamu składu.
Na kaniec navučalnaha hoda ŭ EHU naličvałasia 240 vykładčykaŭ, ź jakich kala 40 — hramadzianie Litvy.
Raniej mnohija vykładčyki pracavali zhodna z damovami ab akazańni pasłuh, što źjaŭlałasia časovaj mieraj, abumoŭlenaj «čakańniem chutkaha viartańnia EHU na radzimu ŭ Minsk, a taksama žadańniem mnohich vykładčykaŭ pražyvać u Biełarusi», havorycca ŭ paviedamleńni.
«Pieramieny nikoli nie byvajuć lohkimi… Niahledziačy na ciažkaści, ja ŭpeŭnieny, što vyniki pracesu adboru staviać EHU na novuju, bolš tryvałuju asnovu i rychtujuć jaho da nastupnaj zadačy: pradastaŭleńnia našym studentam jakasnaj adukacyi ŭ śfiery humanitarnych navuk», — skazaŭ rektar EHU Anatol Michajłaŭ.
Kanflikt u EHU pamiž administracyjaj i sienatam VNU, jaki ŭźnik z pryčyny praviadzieńnia reformy prafiesarska-vykładčyckaha składu univiersiteta, abvastryŭsia ŭ siaredzinie studzienia 2014 hoda. 5 lutaha ź EHU zvolnili staršyniu sienata prafiesara Paŭła Cieraškoviča, daterminova pierapyniŭšy ź im kantrakt.
