Kantrakt koštam 8 miljardaŭ eŭra na pabudovu dvuch sučasnych reaktaraŭ treciaha pakaleńnia byŭ padpisany ŭ časie vizytu Nikala Sarkazi ŭ Kitaj.
Francuskaja dziaržaŭnaja enerhietyčnaja kampanija Areva pabuduje ich dla kitajskaj Kitajskaj jadzierna-enerhietyčnaj kampanii Huandun. Sprajektavanyja firmaj Framatome, što naležyć da hrupy Areva, reaktary buduć mieć supolnuju mahutnaść 3400 mehavat. Jany pačnuć pracu ŭ 2014 hodzie, na palivie, jakoje budzie pastaŭlać Areva, pryčym pastaŭka paliva zakantraktavanaja da 2026 hodu.
Jak viadoma, łukašenkaŭcy majuć namier daručyć pabudovu biełaruskaj AES rasiejcam. «My ŭpeŭnieny na 99 %, što partnioram pa budaŭnictvie atamnaj elektrastancyi ŭ Biełarusi budzie Rasija», — zajaviŭ namieśnik staršyni prezydyjumu NANB Uładzimir Cimašpolski tydzień tamu. Na dumku namieśnika kiraŭnika NANB, «pa technika‑ekanamičnych paramietrach rasijskaje abstalavańnie nie sastupaje dvum inšym vytvorcam, pry hetym jano bolš tannaje». «Akramia taho, pry vybary rasijskich pastaŭščykoŭ my budziem mieć ahulnaść movy i technalohij, mahčymaść u miežach sajuznaj dziaržavy atrymlivać kredyty, rychtavać specyjalistaŭ u rasijskich VNU», — dadaŭ Cimašpolski.
Kitajcy, jak bačym, kirujucca inšaj lohikaj.
U časie vizytu Sarkazi byli padpisanyja kantrakty na dziasiatki miljardaŭ eŭra. Samy vialiki ź ich — zakup kitajcami 160 samalotaŭ «Aerobus».
