zn.by
Hamialčanin Hienadź Karatkievič pieramoh u mižnarodnym čempijanacie pa prahramavańni «Jandeks. Ałharytm».
Jak paviedamlaje pres-słužba kampanii «Jandeks», finał čempijanatu pa spartyŭnym prahramavańni prajšoŭ 1 žniŭnia ŭ Bierlinie.
Sioleta za pieramohu ŭ čempijanacie zmahalisia 3.890 udzielnikaŭ z 72 krain, u tym liku 161 — ź Biełarusi. Pavodle vynikaŭ adboračnaha tura ŭ finał vyjšli 25 najmacniejšych prahramistaŭ ź Biełarusi, Kazachstana, Kitaja, Polščy, Rasii, ZŠA, Tajvania, Ukrainy i Japonii. Hienadź Karatkievič staŭ adzinym pradstaŭnikom Biełarusi ŭ finale.
U vyrašalnym raŭndzie Karatkievič za 100 chvilin pravilna rašyŭ čatyry zadačy z šaści i finišavaŭ usiaho z 66 štrafnymi chvilinami.
Druhim zaviaršyŭ spabornictvy Chasaka Kacuchira ź Japonii (Takijski ŭniviersitet), jaki taksama rašyŭ čatyry zadačy, ale z 90 štrafnymi chvilinami, a trecim — Van Kinšy z kitajskaha ŭniviersiteta Cińchua z čatyrma dakładna rešanymi zadačami i 125 chvilinami štrafu. Čempijon «Ałharytmu» atrymaŭ hrašovy pryz u 300 tysiač rasijskich rubloŭ. Uznaharoda za druhoje i treciaje miesca skłała 150 i 90 tysiač rasijskich rubloŭ adpaviedna.
Jak adznačajecca ŭ paviedamleńni, Karatkievič užo druhi raz zapar pieramahaje ŭ hetych spabornictvach:
letaś jon taksama zabraŭ hałoŭny pryz, apiaredziŭšy rasijanina Jaŭhiena Kapuna (NDU ITMO) i pradstaŭnika Tajvania Šy Bisiunia (jany zaniali druhoje i treciaje miescy adpaviedna).
Spabornictvy prachodzili na płatformie «Jandeks.Contest» — heta servis dla treniroŭki i spabornictvaŭ prahramistaŭ. Zadańni rychtavała mižnarodnaja kamanda, u jakuju ŭvajšli śpiecyjalisty ź Biełarusi, Ukrainy, Rasii, Polščy i ZŠA. Troje ź ich — supracoŭniki minskaha ofisa «Jandeksa» Alaksiej Toŭścikaŭ, Raman Udavičenka i Siarhiej Žhiroŭski, jakija i sami ŭdzielničajuć u roznych mižnarodnych čempijanatach pa prahramavańni, i rychtujuć maładoje pakaleńnie spartsmienaŭ, havorycca ŭ paviedamleńni.
