Biełaruskaja kampanija spasyłajecca na fors-mažornyja abstaviny. Hetuju infarmacyju OilNews paćvierdziła niekalki apytanych kampanij.
Eksparcior biełaruskich naftapraduktaŭ «Biełaruskaja naftavaja kampanija» nakiravała svaim ukrainskich kontrahientam listy z paviedamleńniem ab niemahčymaści vykanańnia ŭ žniŭni pahadnieńniaŭ ab pastaŭkach paliva ŭ poŭnym abjomie.
«Jany (BNK) spasyłajucca na fors-mažor u vyhladzie ramontaŭ NPZ», - paviedamiŭ adzin z našych surazmoŭcaŭ, adznačyŭšy, što pastaŭki składuć 20-30% ad damoŭnych.
«List napisany tak, što nam asabista niezrazumieła, pastaŭki składuć 20-30% ci źniziacca na 20-30%. Situacyja składanaja», - adznačyli ŭ inšym ofisie.
Raniej paviedamlałasia, što ź nieviadomych pryčyn na pačatak žniŭnia byŭ pieraniesieny ramont NPZ «Naftan», raniej płanavany na vierasień. Taksama ŭ siaredzinie žniŭnia čakajecca prypynieńnie na ramont Mazyrskaha NPZ - asnoŭnaha pastaŭnika naftapraduktaŭ va Ukrainu.
Zryŭ abaviazańniaŭ z boku BNK stanovicca ŭžo tradycyjnym. Uletku 2013 hoda «BNK-Ukrajina» taksama była vymušanaja painfarmavać partnioraŭ ab niemahčymaści vykanać doŭhaterminovyja kantrakty. Tady farmalnaj pryčynaj stała avaryja na Mazyrskim NPZ z nastupnym dvuchmiesiačnym ramontam hetaha pradpryjemstva. BNK abiacała nadać uvahu pytańniu stvareńnia rezervaŭ na pieryjad płanavych ramontaŭ dla poŭnaha zabieśpiačeńnia svaich klijentaŭ. U pryvatnaści, uviesnu sioleta kampanija zajaŭlała, što na Mazyrskim NPZ płanujecca budaŭnictva dadatkovaha rezervuarnaha parku dla vysokaaktanavych bienzinaŭ.
Ciažkaści z pastaŭkami ź Biełarusi pačali źjaŭlacca jašče ŭ pačatku lipienia ŭ suviazi z rostam popytu na bienziny z boku Rasiei, jakaja adčuvaje ŭžo tradycyjny sezonny deficyt. Sa słoŭ biełaruskich trejderaŭ, rasiejskija davalcy, jakija zajmajuć 50% u abjomach biełaruskaj pierapracoŭki, całkam adpraŭlajuć usie bienziny ŭ Rasieju. U hetym ža kirunku ssoŭvajecca akcent i BNK, jakaja maje abaviazki ŭ viartańni naftapraduktaŭ u RF u ramkach pahadnieńnia ab pastaŭkach nafty.
Pakolki Biełaruś zajmaje da 50% u pastaŭkach śvietłych naftapraduktaŭ, na ŭkrainskim rynku pačaŭ adčuvacca deficyt prapanovy, jaki, vidavočna, budzie narastać ŭ žniŭni. Užo viadoma, što ŭ žniŭni pastaŭki narościć NPZ Orlen Lietuva. U svaju čarhu, niapeŭnyja pakul pierśpiektyvy pastavak naftapraduktaŭ z mora, jakija pierakryli niastaču paliva ŭletku 2013 hoda.
Situacyja na rynku ŭskładniajecca taksama novym vitkom pasłableńnia kursu hryŭni, što stvaraje novyja ryzyki dla trejderaŭ. U svaju čarhu, spryjalnym čyńnikam źjaŭlajecca achaładžeńnie koštu nafty i naftapraduktaŭ na zamiežnym rynku.
