 |
Pajezdka za miažu biaz zhody načalctva moža stacca padstavaju dla straty pracy. Kiraŭnictva Baranavickaha dziaržaŭnaha ŭniversytetu (BarDU) 26 listapada nie praciahnuła kantrakt sa staršym vykładčykam katedry filazofii j historyi Anatolem Trafimčykam.
Aficyjna kantrakt nie praciahnuty za parušeńnie dyscypliny. Trafimčyk naprykancy 2006 hodu źjedziŭ u Vilniu na kanferencyju historykaŭ biez dazvołu rektaratu. Heta paličyli za palityčnuju dziejnaść.
Rektar Vasil Kačurka ŭ pryvatnaj hutarcy patłumčyŭ Anatolu, što aficyjna jon vyklučany za adsutnaść na pracy, ale ŭ sapraŭdnaści — za palityčnuju dziejnaść.
Anatol źjaŭlajecca kandydatam histayčnych navuk, abaraniaŭsia ŭ Intsytucie historyi NAN Ukrainy. Na Baćkaŭšynie taki dyplom nie pryznany. Tamu pa zasnavańni BarDU pačynaŭ pracu dacentam. Potym byŭ «razžałavany» da starejšych vykładčykaŭ. Adbyłosia toje amal adrazu pa jaho kamentary pra balšavickuju kastryčnickuju revalucyju dla niezaležnaha baranavickaha tydniovika «Intex‑press».
Pra toje, što adbyłosia potym, raskazvaje sam Trafimčyk:
— Paśla, u vieraśni 2007 hodu rektar nie puściŭ mianie ŭ Polšču, kudy ja byŭ zaprošany na kanferencyju. Skazaŭ, što, maŭlaŭ, zvolnim, tady i pajedzieš. Rektar zakidaŭ mnie publikacyi ŭ niedziaržaŭnych vydańniach, takich jak «ARCHE», baranavickim «Intex‑press» dy «Hancavickim Časie». Na dumku Kučurki, takoje nielha rabić vykładčyku dziaržaŭnaj ustanovy. Zrazumieła, heta nie pisałasia ŭ pratakole kamisii. Było, adnak, zaznačana, što jak vykładčyk i navukoviec ja zadavalniaju ŭniversytet. Ale idealohija patrabuje čyścini.
Anatol Trafimčyk z humaram kamentuje padziei, što adbylisia ź im:
— Kirujučysia lohikaj Kačurki, pavodle jakoj jon robić mianie apazycyjaneram za pajezdku za miažu, možna pryjści da žachlivych vysnovaŭ, bo samo kiraŭnicva BarDU jeździć za hranicu našmat čaściej za mianie. Pa‑druhoje, jany abvinavačvajuć mianie ŭ apazycyjnaści na padstavie maich pablikacyj. Ale ja drukavaŭsia i ŭ časopisie administracyi prezydenta «Biełaruskaja Dumka» —. Ci, moža, BD taksama apazycyjnaja? A jak patłumačyć, što kiraŭnicva BarDU nie čytaje BD, ale čytaje apazycyjnyja ŚMI? Pa‑treciaje, svaimi dziejańniami jany vyšturchoŭvajuć mianie ŭ palityčnaje pole apazycyi. Raniej ja ŭ saich dziejańniach namahaŭsia być apalityčnym. Kamu heta vyhodna — uładzie ci apazycyi?
Na maje pytańnie, ci nia stałasia biełaruskaja mova, jakoj zaŭsiody karystajecca Anatol, padstavaju dla zvalnieńnia, Trafimčyk adkazaŭ:
— Pra heta nichto adkyta nia zhadvaŭ. Praŭda, pa ŭstanovie daŭno chadzili pierašepty, što «vot on razhovarivajet na biełaruskaj movie». Siarod vykładčykaŭ ja navat atrymaŭ mianušku «Biełarus». Studenty ž staviacca da movy na lekcyjach narmalna.
Pa skančeńni kantraktu, z 1 śniežnia, Anatol źbirajecca adpačyć. Choča palažać na piačy ŭ baćkoŭskaj chacie, što ŭ Vialikich Kruhovičach Hancavickaha rajonu.
Adnačasova budzie zajmacca navukovaj dziejnaściu. Na siońnia saśpieła patreba ŭ dapisańni dźviuch manahrafij pa historyi 1‑j pałovy XX stahodździa i dźviuch navukova‑papulanych manahrafij. Raniej nie stavała času. Pa słovach Anatola, jon užo maje prapanovy pracy za miežami Biełarusi. Ad Niamieččyny da Litvy. Budzie čas vyznačycca.
