 |
Na praciahu hodu ŭ dačynieńni da staršyni kleckaj supołki BNF i vydaŭca biuleteniu «Bojki Kleck» Siarhieja Panamarova čatyry razy raspačynali i prypyniali kryminalnuju spravu pavodle č.2 art. 188 KK RB (paklop u drukavanych srodkach). Nahodaj dla zaviadzieńnia spravy stała natatka ŭ «Bojkim Klecku» pra kiraŭnika Kleckaj jurydyčnaj kansultacyi Natallu Siemaškievič. Dvojčy admysłovaja ekspertyza nie znachodziła parušeńniaŭ Kryminalnaha kodeksu i spravu prypyniali za adsutnaściu składu złačynstva.
«Piaty raz pačynajecca hety cyrk» — kaža sp. Panamaroŭ. Pavodle jaho słovaŭ, na minułym tydni jaho dvojčy vyklikali na dopyt, robiačy heta z parušeńniem zakonu — pieršy raz pa telefonie, druhim razam u poźvie adsutničali piačatka i tłumačeńnie ŭ jakaści kaho jon vyklikajecca na dopyt.
«Ja patłumačyŭ kleckamu śledčamu A. Šyšu, što źjaŭlusia na dopyt tolki razam z advakatam i tolki paśla taho, jak buduć vykananyja ŭsie nieabchodnyja pracedury» — raspavioŭ S. Panamaroŭ.
Na dopycie jon daviedaŭsia pra inicyjatyvu pamočnika prakurora Valanciny Labiedźka i, spasyłajučysia na art.127 Kanstytucyi, admoviŭsia adkazvać na pytańni śledčaha. Pytańni byli tyja samyja, na jakija klecki aktyvist adkazvaŭ ciaham hodu nia raz. Jahony advakat Alaksandar Halijeŭ rychtuje skarhu na dziejańni Kleckaj prakuratury.
«Heta ŭsio praz maju hazetku — jana hałoŭnaja balačka miascovych načalnikaŭ i asabista kiraŭnika Kleckaha rajvykankamu» — patłumačyŭ cikavaść da svajoj persony z boku milicyi i prakuratury Siarhiej Panamaroŭ.
