Alena Anisim, fota Siarhieja Hudzilina
Apazicyjnyja palityčnyja siły praciahvajuć pošuk mahčymych kandydataŭ na prezidenckija vybary 2015 hoda. Siarod patencyjnych pretendentaŭ źjaviłasia proźvišča 51-hadovaha fiłołaha Aleny Anisim. Jaje kandydaturu hatovaja padtrymać Rada biełaruskaj intelihiencyi. «Samaj hałoŭnaj zadačaj źjaŭlajecca kansalidacyja ŭsich patryjatyčnych siłaŭ, — kaža spadarynia Alena.
— Udzieł u prezidenckich vybarach, chutčej, pytańnie druhasnaje. Pieršasnaje — pytańnie niezaležnaści. Što tyčycca vyłučeńnia, to heta pytańnie nie stolki da mianie, kolki da hramadstva.
Kali nacyjanalnyja siły vyrašać vyłučyć mianie jak kandydata ŭ prezidenty, to ja hatovaja».
Ci nie strašna sychodzić z hramadskaj dziejnaści ŭ palityku? «My ŭsie ŭ palitycy ad taho momantu, jak nam spaŭniajecca 18 hadoŭ i my možam udzielničać u vybarach. Ja ŭ hramadskaj dziejnaści dosyć daŭno, časam nie ja sama, a ludzi padšturchoŭvajuć mianie ŭziać adkaznaść za bolšy kavałak pracy. U palityku iści mnie nie strašna, bo ja ŭžo dosyć pažyła, toje-sioje maju za plačyma, jak u asabistym, hetak i ŭ prafiesijnym, ty razumieješ, ci tabie spynicca na peŭnym uzroście, ci raści dalej».
Spadarynia Anisim kaža, što ciapier viadziecca praca pa padrychtoŭcy da sklikańnia Kanhresu za niezaležnaść Biełarusi, jaki musić adbycca da kanca hoda.
Razam z tym jana padkreślivaje, što TBM — heta nie palityčnaja arhanizacyja i nijakim čynam u prezidenckaj kampanii arhanizacyja ŭdzielničać nie budzie.
Alena Anisim naradziłasia 28 vieraśnia 1962 hoda ŭ vioscy Savani na Staŭpieččynie Minskaj vobłaści.
Skončyła fiłfak BDU.
Jašče ŭ hłuchi saviecki čas jana była aktyŭnaj udzielnicaj padpolnaj niezaležnickaj supołki «Majstroŭnia». Z 1991 hoda pracuje ŭ Instytucie movaznaŭstva Nacyjanalnaj akademii navuk (z 2008 hoda nazyvajecca Instytut movy i litaratury).
Namieśnica staršyni Tavarystva biełaruskaj movy imia Franciška Skaryny, adna ź viadoŭcaŭ štotydniovaj prahramy «Biełaruskaja mova» na telekanale ANT.