Adychod Łukašenki ŭ cień adrazu paśla vybaraŭ naradziŭ chvalu čutak i versijaŭ. Udzieł u hetym prymajuć palityki, ajčynnyja i zamiežnyja žurnalisty, a taksama abyvatali. Raspaŭsiudu čutak nie ŭ apošniuju čarhu spryjaje stan niezaležnaj presy (faktyčna – jaje adsutnaść) i tatalnaja padkantrolnaść dziaržaŭnych ŚMI.
Pieršymi na adsutnaść prezydenta ŭ etery dziaržtelebačańnia i na pieradavicach aficyjnych hazetaŭ źviarnuli ŭvahu internet-vydańni. Było zaŭvažana, što paśla pres-kanferencyi, pryśviečanaj ašałamlalnamu pieraabrańniu Łukašenki na treci termin, jon faktyčna nie źjaŭlaŭsia ŭ ŚMI vosiem dzion. Potym byla zajava prezydenta pra pierachod da ekanamičnych formaŭ kiravańnia, z adnačasovaj admovaj ad kamandna-administratyŭnaha stylu i prajavaŭ važdzizmu (čynoŭnikam nastojliva paraili pazdymać partrety Łukašenki sa ścienaŭ kabinetaŭ). Adnak užo na nastupny dzień papaŭźli čutki, što BT, aśviatlajučy zajavy Łukašenki, pakazała sastarełuju «karcinku», dadtavanuju śniežniem minułaha hodu. Heta naradziła novuju porcyju čutak i mierkavańniaŭ. Źjaviłasia dumka, što Łukašenka ciažka chvory, albo ŭvohule pamior. Zajava Centarvybarkamu pra pieranos daty inaŭhuracyi prezydenta tolki padahreła žarści.
Biełaruskaja apazycyja ŭ asobie Alaksandra Milinkieviča prapanavała svajo bačańnie na niazvykła praciahłuju adsutnaść Łukašenki ŭ medyjnaj prastory – dyktatar nie čakaŭ takoha maštabu supracivu z boku niezaležnaha hramadztva.
Svaje versii prapanavali zamiežnyja vydańni. Žurnalist brytanskaj «Times» Džeremi Pejdž, spasyłajučysia na zachodniaha dyplamata, piša, što Łukašenka pakutuje ad prystupu depresii, vyklikanaha stresam ad vybaraŭ i reakcyi na ich niezaležnaha hramadztva. Druhoj pryčynaj kiepskaha stanu prezydenta dyplamat bačyć niaprostyja stasunki z rasiejskim «Hazpramam», jaki adrazu pa vybarach abvieściŭ pra novyja košty na haz z nastupnaha hodu, u piać razoŭ vyšejšyja za siońniašnija. Hetaj ža versii prytrymlivajecca i «New York Times». Pra stres prezydenta piša taksama brytanskaja «Guardian»: «Pieranos inaŭhuracyi prymušaje zadumacca pra stan zdaroŭja biełaruskaha prezydenta». Rasiejskija «Novyje Iźviestija» pišuć pra mahčymaść zmovy ŭ bližejšym atačeńni Łukašenki, a taksama pra napružanyja pieramovy z Maskvoj nakont koštaŭ na enerhanośbity. «NI» taksama prakamentavali aficyjnuju zajavu pra pracu prezydenta z dakumentami: «U svoj čas, kali zamiežnyja ŚMI paviedamlali pra składanuju aperacyju ŭ tahačasnaha prezydenta Rasiei Barysa Jelcyna, aficyjnyja medyi śćjardžali, što jon pracuje z papierami». A českaja «Mlada Fronta Dnes» paviedamlaje, što Łukašenka katajecca na łyžach. Dziaržaŭnaja presa ad kamentaroŭ na hetuju temu ŭstrymlivajecca.
Reakcyjaj aficyjnych ŭładaŭ stali zajavy staršyni parlamantu Ŭładzimiera Kanaplova pra «upeŭnienuju i biezumoŭnuju pieramohu» Łukašenki na vybarach i kiraŭnika Administracyi prezydenta Hienadzia Niavyhłasa pra vydatny fizyčny stan Łukašenki: «U subotu my hulali z prezydentam u chakiej i jon pieramoh nas z razhromnym likam».
Prostyja hramadzianie taksama nie zastalisia ŭ baku ad padziei. Najbolš aktyŭnymi ŭ raspaŭsiudzie zdahadak i plotak pra mahčymyja pryčyny źniknieńnia prezydenta apynulisia karystalniki internetu. Pra što havorać i nazvy forumaŭ – «Łukašenka pamiraje, Šejman uciakaje», «Prezydent źnik, abo DZIE?» (kolkaść naviednikaŭ – kala 70000).
Siarod inšych mierkavańniaŭ prahučała versija pra zachop ułady Viktaram Łukašenkam, jaki kiruje siłavymi strukturami Biełarusi.
Žartaŭniki prapanujuć na čarhovaj akcyi «Łancuh nieabyjakavych ludziej» pavialičyć kolkaść partretaŭ źnikłych palitykaŭ za košt źniataha z kabinetnaj ściany jašče adnaho partretu. Ci voś takaja tema dla čarhovaha fłeš-mobu – hramadzianie na vulicach horadu ź plakatami «Šukaju Baćku». Aktyŭna abmiarkoŭvajecca i tema mahčymaj śmierci prezydenta. Tak, u Horadni nieviadovy naładziŭ rassyłku SMS z adpaviednym paviedamleńniem.
Padčas letašniaj tatalnaj začystki infarmacyjnaj prastory, kali bolš dziasiatka niezaležnych vydańniaŭ byli pazbaŭlenyja mahčymaści lehalnaha raspaŭsiudu, niezaležnyja analityki papiaredžvali pra niepradkazalnaść nastupstvaŭ takoha kroku. Šmat chto kazaŭ, što adsutnaść starońniaha pohladu moža zhulać z uładaj kiepski žart. Bo taki infarmacyjny vakuum robić niemahčymaj adekvatnuju acenku toj ci inšaj sytuacyi. Što my i nazirajem siońnia.
