Dastaŭkaj internet-pakupak pavinna zajmacca prafiesijnaja słužba. Takuju dumku vykazała namieśnik handlu Biełarusi Iryna Narkievič u čas kruhłaha stała «Internet-handal u Biełarusi: ustarełyja stereatypy i niavyrašanyja prablemy» ŭ pres-centry BIEŁTA.
Havoračy ab pierśpiektyvach raźvićcia rynku internet-handlu, namieśnik ministra adznačyła: «U internet-handli budzie aktyŭna raźvivacca servis pasłuh. Naprykład, kurjerskaja dastaŭka. Hetu pasłuhu treba adździalić ad handlu, kab byli prafiesijnyja słužby, jakija dakładna adkazvajuć za terminy dastaŭki».
Iryna Narkievič padkreśliła, što Ministerstva handlu jak rehulatar zacikaŭlena, kab internet-handal raźvivaŭsia nie tolki ŭ stalicy, ale i ŭ rehijonach. U tym liku hetamu budzie sadziejničać źjaŭleńnie prafiesijnaj kurjerskaj słužby.
Apošnim časam rehijanalny internet-handal staŭ aktyŭna raźvivacca. Na 1 studzienia 2013 hoda dola zarehistravanych u stalicy internet-mahazinaŭ składała 74,8%, a na hety čas jana źniziłasia da 69,7%. Pry hetym u Mahiloŭskaj vobłaści kolkaść internet-mahazinaŭ pavialičyłasia na 2,1%, u Viciebskaj — na 3,6%, u Bresckaj — na 4,9%, u Homielskaj — na 3,7%, a ŭ Minskaj vobłaści — na 11,9%.
«Raniej ličyłasia, što internet-handal pracuje tolki ŭ stalicy. A siońnia kožnaja kampanija, jakaja siabie pavažaje, niavažna, dzie jana zarehistravana, pavinna mieć mahčymaść dastaŭki tavaru ŭ lubuju kropku krainy, a mahčyma, i za jaje miežy, — adznačyŭ kiraŭnik, zasnavalnik anłajn-hipiermarkieta 21vek.by Siarhiej Vajniłovič. — Naprykład, u našaj kampanii bolš jak pałavina pakupak robicca za miežami horada Minska».
Pavodle słoŭ biźniesmiena, dziakujučy praniknieńniu internetu ŭ rehijony raście dola pakupnikoŭ starejšaha ŭzrostu. Takija spažyŭcy majuć bolš patrabavalny padychod, a značyć, prymušajuć halinu raźvivacca. «Kali moładź pryvablivaje mahčymaść zekanomić, kupić tavar pa bolš vyhadnaj canie, to ludzi siaredniaha i starejšaha ŭzrostu ceniać kamfort i prastatu nabyćcia tavaru», — rasłumačyŭ Siarhiej Vajniłovič.
