Biełaruski płyviec Jaŭhien Curkin vyjhraŭ załaty miedal čempijanatu Jeŭropy pa vodnych vidach sportu, jaki prachodzić u Bierlinie (Hiermanija), na dystancyi 50 m baterflajem, adnak nie staŭ adnaasobnym pieramožcam. U siońniašnim finalnym zapłyvie anałahičnaje z Curkina čas pakazaŭ jaho apanient z Francyi.
Jaŭhien Curkin i francuz Fłaran Manado, jaki źjaŭlajecca alimpijskim čempijonam 2012 (na dystancyi 50 m volnym stylem), pakazali siońnia ŭ finale ČIE-2014 adnolkavy čas — 23,00 siek. Paśla startu vyrašalnaha zapłyvu na 50 m baterflajem biełarus trochi adstavaŭ ad kankurentaŭ, adnak nahnaŭ upuščanaje na druhoj pałovie dystancyi. Siarod finalistaŭ čas paŭfinalnaha zapłyvu Curkina byŭ horšym (23,60 siek.), i vyrašalny zapłyŭ jon pravodziŭ pa 8-j darožcy.
Srebny miedal na 50-mietrovaj dystancyi baterflajem nie budzie ŭručany, zatoje na treciuju prystupku pastamienta, jak i na pieršuju, uzyšli adrazu dva płyŭca — ukrainiec Andrej Hovaraŭ i brytaniec Biendžamin Praŭd (ich finišny čas — 23,21 siek.).
Jaŭhien Curkin zavajavaŭ pieršy miedal dla zbornaj Biełarusi na ČIE-2014 pa vodnych vidach sportu. U inšych finałach siońniašniaha dnia biełarusy nie vystupajuć.
Kantynientalnaje pieršynstvo finišuje ŭ stalicy Hiermanii 24 žniŭnia.
