U Biełarusi stvarajecca Respublikanskaja ekśpiertnaja kamisija pa acency infarmacyjnaj pradukcyi na pradmiet najaŭnaści (adsutnaści) u joj prykmiet prajaŭ ekstremizmu. Heta praduhledžana pastanovaj Saŭmina numar 810 ad 21 žniŭnia 2014 hoda, paviedamili ŭ pres-słužbie biełaruskaha ŭrada.
Pastanova praduhledžvaje i stvareńnie sistemy ekśpiertnych kamisij u kožnaj z abłaściej Biełarusi. Respublikanskaja ekśpiertnaja kamisija, stvoranaja pry Ministerstvie infarmacyi, budzie taksama vykonvać funkcyi ekśpiertnaj kamisii pa horadzie Minsku.
U kamisiju ŭvojduć aŭtarytetnyja ekśpierty ŭ śfiery fiłasofii, psichałohii, fiłałohii, sacyjałohii, a taksama pradstaŭniki orhanaŭ dziaržaŭnaha kiravańnia, jakija ažyćciaŭlajuć procidziejańnie ekstremizmu, što daść mahčymaść usiebakova i kampietentna razhladać materyjały na pradmiet najaŭnaści ŭ ich prykmiet ekstremizmu.
Respublikanskaja kamisija budzie pravodzić ekśpiertyzu infarmacyjnaj pradukcyi na terytoryi Minska. Taksama ŭ jaje kampietencyi ŭzhadnieńnie pałažeńniaŭ ab abłasnych kamisijach i ich składzie, raspracoŭka rekamiendacyj dla abłasnych kamisij. Akramia taho, jana budzie razhladać skarhi na ekśpiertnyja zaklučeńni abłasnych kamisij, vyvučać i raspaŭsiudžvać ajčynny i zamiežny vopyt praduchileńnia prapahandy ekstremisckaj dziejnaści ŭ infarmpradukcyi.
Kamisija budzie mieć prava zapytvać i atrymlivać nieabchodnyja dakumienty, materyjały i infarmacyju, jakija majuć značeńnie dla praviadzieńnia ekśpiertyz. Taksama jana zmoža zaprašać i zasłuchoŭvać na svaich pasiadžeńniach pradstaŭnikoŭ dziaržorhanaŭ, arhanizacyj, hramadskich abjadnańniaŭ i indyvidualnych pradprymalnikaŭ. Pry nieabchodnaści dla ekśpiertyz buduć pryciahvacca roznyja śpiecyjalisty, hramadskija dziejačy, jakija nie ŭvachodziać u kamisiju.
Padstavami dla praviadzieńnia ekśpiertyzy infarmacyjnaj pradukcyi buduć zvaroty dziaržaŭnych orhanaŭ, arhanizacyj, hramadskich abjadnańniaŭ i indyvidualnych pradprymalnikaŭ, a taksama pastanova dziaržorhanaŭ abo słužbovych asob, jakija majuć adpaviednaje prava.
Ekśpiertnaje zaklučeńnie ekśpiertnaj kamisii možna budzie abskardzić u sudovym paradku, a abłasnoj kamisii — u respublikanskaj abo ŭ sudzie.
Jak rastłumačyli ŭ Ministerstvie infarmacyi, pastanova Savieta Ministraŭ pryniata ŭ raźvićcio zakona Biełarusi «Ab procidziejańni ekstremizmu». «Dakumient pryniaty ŭ metach niedapuščeńnia raspaŭsiudžvańnia na terytoryi Biełarusi infarmacyjnych materyjałaŭ ekstremisckaha charaktaru, dla abarony hramadskich intaresaŭ ad destruktyŭnych prajaŭ u infarmacyjnaj prastory», — padkreślili ŭ Mininfarmie.
