29 listapada ŭ Minsku, u parku imia Čaluskincaŭ i va ŭročyščy Kurapaty, adbyłosia tradycyjnaje paminańnie achviar stalinizmu, arhanizavanaje hramadskim arhkamitetam pa ŭviekaviečańni pamiaci achviar stalinskich represij.
Udzielniki paminańnia zapalili śviečki la kaplicy ŭ parku imia Čaluskincaŭ i ŭ Kurapatach — la Kryža pakutaŭ, Łavy «Klintana», miemaryjalnaha kamienia sa słovami «Achviaram stalinizmu», pamiatnych znakaŭ palakam i jaŭrejam, jakija zahinuli ŭ hady stalinskaha teroru.
Jak zaznačyŭ sustaršynia arhkamiteta piśmieńnik Vasil Jakavienka, u novym hodzie arhkamitet praciahnie svaju rabotu ŭ składzie miemaryjalnaj siekcyi RHA «Biełaruskaje dobraachvotnaje tavarystva achovy pomnikaŭ historyi i kultury». Pavodle jaho słoŭ, praduhledžvajecca adkryćcio novych pamiatnych znakaŭ na miescach masavaha źniščeńnia i pachavańnia biaźvinnych ludziej, ustanaŭleńnie imion nieviadomych achviar stalinizmu i składańnie poŭnaha śpisa viosak, u jakich pravodzilisia masavyja represii, a taksama publikacyja novych materyjałaŭ pa temie balšavickaha teroru.
Sakratar arhkamiteta Uładzimir Ramanoŭski zaznačyŭ, što dziejnaść arhkamiteta «zaklikana abudzić hramadstva da asensavańnia ŭrokaŭ historyi i sadziejničać adnaŭleńniu maralnych asnoŭ šanavańnia pamiaci zahinułych ludziej». Pavodle jaho słoŭ, narod asudžany na stratu niezaležnaj nacyjanalnaj dziaržavy, «kali ludzi buduć žyć tolki siońniašnim dniom i nie zmohuć adčuć siabie źvianom u histaryčnym łancuhu pakaleńniaŭ biełarusaŭ, u jakich jość minułaje, sučasnaje i budučynia».
Pradstaŭniki siłavych struktur nie pieraškadžali praviadzieńniu paminańnia.