 |
30 listapada deputaty Minharsavieta admianili svajo rašeńnie ab pierajmienavańni vulicy Biersana ŭ vulicu Edvarda Vajniłoviča.
Nahadajem, inicyjatyva pierajmienavańnia vulicy Biersana ŭ vulicu Edvarda Vajniłoviča naležyć pradstaŭnikam rymska‑katalickaj carkvy.
Jak paviedamiła ŭ svaim vystupleńni na 7‑j pazačarhovaj siesii Minharsavieta staršynia pastajannaj kamisii pa adukacyi, navucy, kultury i sporcie Iryna Rodzik, Ministerstva justycyi nie zarehistravała rašeńnie Minskaha haradskoha savieta deputataŭ ad 26 vieraśnia ab pierajmienavańni staličnaj vulicy Biersana i prysvajeńni vulicam, jakija budujucca ŭ horadzie, imionaŭ Janki Bryla i Lva Sapiehi.
«Paśla pravavoj ekśpiertyzy Miniust zaznačyŭ, što ŭ hetym rašeńni nie było ŭličana mierkavańnie nasielnictva», — zaznačyła I.Rodzik.
Pavodle jaje słoŭ, Minharsaviet nakiravaŭ u Miniust list z tłumačeńniem. U im kazałasia, što nie isnuje miechanizmu ŭliku dumki nasielnictva pry pryniaćci rašeńnia ab pierajmienavańni vulic, a taksama pryvodzilisia materyjały sa ŚMI. Ale Miniust paličyŭ hetyja arhumienty nieabhruntavanymi i nie ŭklučyŭ rašeńnie Minharsavieta ŭ Nacyjanalny pravavy rejestr.
U vyniku siońnia Minharsaviet pryniaŭ novaje rašeńnie, zhodna ź jakim dźvie vulicy, što prajektujucca, ad praśpiekta Haziety «Źviazda» da vulicy Hurskaha buduć nazvanyja ŭ honar kłasika biełaruskaj litaratury Janki Bryla i vybitnoha dziaržaŭnaha i palityčnaha dziejača Biełarusi, kanclera Vialikaha kniastva Litoŭskaha Lva Sapiehi (z hetaj prapanovaj źviarnulisia pradstaŭniki HA «Tavarystva biełaruskaj movy imia Franciška Skaryny» i šerah staličnych dziejačaŭ kultury). Aprača taho, pa prośbie pradstaŭnikoŭ pravasłaŭnaj carkvy biezymienny prajezd ad vulicy Kalinoŭskaha da Minskaj kalcavoj aŭtadarohi budzie nazyvacca vulica Usichśviackaja.
