Prezident Ukrainy Piatro Parašenka na sustrečy ŭ Minsku prapanavaŭ kiraŭnikam krain Mytnaha sajuza i pradstaŭnikam Jeŭrasajuza pryniać jaho płan mirnaha ŭrehulavańnia.
«Tut vyrašajecca los śvietu i Jeŭropy, — zajaviŭ jon. — Meta majho pryjezdu ŭ Minsk — spynić krovapralićcie i pačać praces pošuku palityčnaha kampramisu».
Ukrainski lidar pierakanany, što jaho mirny płan ŭrehulavańnia situacyi va Ukrainie zastajecca aktualnym. Jon źviarnuŭsia da lidaraŭ jašče raz «pahladzieć hety płan i pryniać jaho».
Piatro Parašenka taksama prapanavaŭ «damovicca ab stvareńni manitorynhavaj hrupy, jakaja budzie manitoryć realny, a nie hipatetyčny mahčymy ŭron. «I paśla taho jak hety ŭron budzie zafiksavany, pahavaryć ab miechanizmach kampiensacyi abo abarony», — skazaŭ jon.
Prezident Ukrainy ličyć mahčymym pačać dyjałoh ab pierachodzie da sistemy ŭzajemnaha pryznańnia siertyfikataŭ, uzajemnaha pryznańnia zaklučeńnia łabaratoryj dla vyrašeńnia fitasanitarnych prablem.
Pavodle słoŭ Parašenki, handlovy abarot Ukrainy z Mytnym sajuzam upaŭ na 30%. «Što źjaŭlajecca niavyhadnym jak dla Ukrainy, tak i dla našych partnioraŭ z MS, — zajaviŭ jon. — Ni ŭ jakim vypadku nielha dapuścić dalejšych paharšeńniaŭ umoŭ handlu».
Parašenka asabliva adznačyŭ, što siońnia adaptacyja pravavoj bazy SND da novych umoŭ, u tym liku šlacham zaklučeńnia novych siektaralnych pahadnieńniaŭ, naprykład z metaj praduchileńnia nietaryfnych barjeraŭ u handli, źjaŭlajecca klučavym pryjarytetam.
Prezident Ukrainy zaprasiŭ ES i Mytny sajuz da ŭdziełu ŭ kanfierencyi donaraŭ Ukrainy vosieńniu 2014 hoda. «Užo siońnia my razhladajem varyjanty postkanfliktnaha raźvićcia rehijona (Danbasa), i mižnarodnaja supolnaść zajaŭlaje pra hatoŭnaść dapamahčy Ukrainie ŭ adpaviednych namahańniach. Našy zamiežnyja partniory hatovy zrabić kankretnyja prapanovy padčas mižnarodnaj donarskaj kanfierencyi, jakaja zapłanavana na vosień hetaha hoda», — adznačyŭ Parašenka.