Leŭ Marholin adznačyŭ, što na siońniašni momant u pradprymalnickim ruchu Biełarusi isnuje dva punkty hledžańnia na vyrašeńnie prablemy.
«Pieršy pradstaŭlaje arhanizacyja «Perspektyva» z Anatolem Šumčankam, jakija damahajucca sustrečy z prezydentam, prosiać kiraŭnika dziaržavy ich pačuć i adhuknucca. Druhaja hrupa — heta tyja ludzi, chto ličyć, što svaje pravy treba abaraniać svaimi ž siłami. Mitynh 10 śniežnia adbudziecca na Kastryčnickaj płoščy, a nie na Banhałory, jak by niekatoryja hetaha nie chacieli. Heta nia budzie adzinkavaj akcyjaj, my budziem ich praciahvać da toj pary pakul ukaz №760 nia budzie admienieny», — kaža Ł.Marholin.
Staršynia kampanii «Za svabodnaje raźvićcio pradprymalnictva» Viktar Harbačoŭ ličyć, što nastupny hod stanie losavyznačalnym dla ŭsich drobnych i siarednich handlaroŭ krainy.
«Ukaz №760 najbolš žorstki za ŭsie časy isnavańnia ŭ Biełarusi pradprymalnikaŭ. Heta ŭkaz pracuje na spraščeńnie drobnaha i siaredniaha biznesu na karyść bujnoha. Mitynh pratestu 10 śniežnia — heta naša abarončaja reakcyja. Nijakaha asabista pijaru ni ŭ kaho z nas niama — u nas adny mety. Navat 100 čałaviek u paniadziełak na Kastryčnickaj płoščy — heta ŭžo niamała. 2008 hod daść nam adkaz ci zastaniecca ŭvohule ŭ Biełarusi mały biznes», — ličyć V.Harbačoŭ.
Pa słovach pradprymalnikaŭ kala 60% handlaroŭ pa ŭsioj krainie viedajuć pra paniadziełkavy mitynh. U rehijonach apošnimi dniami pa rynkach pačali chadzić pradstaŭniki specsłužbaŭ i MUS, jakija sprabujuć vyśvietlić, kolki čałaviek źbirajecca jechać 10 śniežnia ŭ Miensk. Tak, učora va ŭłasnaj kvatery ŭ Homieli ŭ abłohu milicyjantami była ŭziataja Iryna Kaminskaja, jakija źbirałasia pravieści schod pradprymalnikaŭ adnaho z haradzkich rynkaŭ.
Aleś Taŭstyka, jaki tolki ŭčora vyjšaŭ z Akreścina paśla 7 sutak aryštu, pieradaŭ usim prysutnym pryvitańnie ad Rusłana Łucenki, jon vyjdzie na volu tolki ŭ subotu. Pa słovach Taŭstyki, aproč sacyjalnych patrabavańniaŭ, na akcyi zahučać i palityčnyja. Prynamsi, buduć ahučvacca 12 patrabavańniaŭ Eŭrakamisii da biełaruskich uładaŭ. Užo siońnia viadoma, što siabry kampanii «Za svabodnaje raźvićcio pradprymalnictva» naleta buduć udzielničać u parlamenckich vybarach. «Tolki, kali našy pradstaŭniki buduć u parlamencie my zmožam niejak abaranić svaje pravy», — ličyć Viktar Harbačoŭ.
Arhanizatary nie vyklučajuć, što 10 śniežnia ŭsie podstupy da Kastryčnickaj płoščy buduć pierakrytyja AMAPam, u takim vypadku jany zhodnyja pravieści svoj mitynh na placoŭcy la cyrku, ci ŭ parku imia Janki Kupały. «Samyja adčajnyja navat abiacajuć ustalavać namioty na Kastryčnickaj», — kaža V.Harbačoŭ.
Viktar Kalej kaža, što apošnim časam pačaŭ chadzić u dvuch švedrach, bo adčuvaje niebiaśpieku trapić na sutki.
Pradprymalniki zaklikajuć usich nieabyjakavych pryjści 10 śniežnia na Kastryčnickuju płošču a 12:00.
 Mikałaj Ramašyn, Aleś Taŭstyka, Viktar Harbačoŭ, Viktar Kalej, Alaksandar Makajeŭ |
