U Mahilovie indyvidualnyja pradprymalniki, jakija handlujuć na Centralnym (Minskim) rynku, paviedamlajuć, što milicyja, ABEZ i padatkovaja inśpiekcyja praviali pravierki, jakija prajšli ŭ formie abłaŭ z adbirańniem tavaru.
Jak paviedamiła BiełaPAN handlarka vinahradam, pradprymalnica Volha, u čaćvier 18 vieraśnia na rynak «u litaralnym sensie nalacieli praviaralščyki». «Z usich bakoŭ vybiahali chto ŭ cyvilnym, chto ŭ formie, padatkovaja, ABEZ, milicyja. Prymusili ŭsich vyjści z-za pryłaŭkaŭ. Va ŭsich zabrali dakumienty», - raspaviała žančyna.
Pavodle jaje słoŭ, byli pierakrytyja ŭsie ŭvachody na rynak, pakupnikoŭ tolki vypuskali, ale nie ŭpuskali na jaho. «Niezrazumieła, na jakoj padstavie jany začyniali rynak. U mianie ŭsie dakumienty ŭ paradku, ale ja nie mahła ničoha pradać u toj dzień, pakolki rynak byŭ začynieny, niahledziačy na toje, što ŭ mianie ŭsio vypłačana», — kaža Volha, paviedamiŭšy, što abłava praciahvałasia pryblizna z 11.30 da 16.00.
Pradprymalnica Valancina paviedamiła, što pretenzii praviaralščykaŭ tyčylisia nakładnych adnosna miesca handlu na rynku. «Nie było ŭkazana miesca. Ale heta rynak, heta vulica, nia paviljon. Tut moža być siońnia adno miesca, a zaŭtra inšaje», - skazała jana, adznačyŭšy, što nakładnyja na nabyćcio tavaru byli ŭ paradku va ŭsich.
Pradprymalniki paviedamili, što milicyja admaŭlałasia paznačaćpravierku ŭ najaŭnych u kožnaha handlara knihach pravierak. «Milicyjanty kazali, što paŭnamoctvy na pravierku jość, a na zapis u knizie pravierak paŭnamoctvaŭ niama. A dla čaho tady knihi?» - adznačali handlary.
Pa ich słovach, u mnohich pradprymalnikaŭ byŭ kanfiskavany tavar, jaki «vieźli «Hazielami». Što budzie dalej z tavaram i ź imi, handlary viedajuć. «Nam skazali, što patelefanujuć», - kažuć jany, adznačajučy, što čakajuć suda.
Handlary śćviardžajuć, što padobnaja pravierka ŭ vyhladzie abłavy prajšła ŭpieršyniu na Minskim rynku. Jany nie zmahli skazać, jakoje viedamstva stała inicyjataram dadzienaj akcyi, i chto kankretna joju kiravaŭ.
Aficyjnych kamientaroŭ dadzienaj situacyi pakul nie było.
