U kancy žniŭnia mnohija ŚMI paviedamlali, što vajskoŭcaŭ rasijskaj armii pad vyhladam apałčencaŭ buduć adpraŭlać u Danbas. Naturalna, Ministerstva abarony Rasii ci nazyvała hetuju infarmacyju čutkami, ci ŭvohule nie «apuskałasia» da kamientaroŭ.
Adnak kolkaść tryvožnych sihnałaŭ rasła jak śniežny kom, i z hetym treba było niešta rabić.
«Peŭnych źviestak z vartych davieru krynic u nas nie było, — raspaviadaje pres-sakratar «Sałdackich maci Pieciarburha» Alaksandr Pieradruk. — Ale było vielmi šmat sihnałaŭ ad ludziej, jakija pradstaŭlalisia svajakami vajskoŭcaŭ.
Kab pravieryć infarmacyju, my miesiac tamu nakiravali zapyt u Minabarony, u jakim prasili pravieryć nastupnyja fakty:
1. Vajennasłužačym v/č 71211 (331-y hvardziejski parašutna-desantny połk, h. Kastrama), jakija ŭ ciapierašni čas znachodziacca ŭ punkcie časovaj dysłakacyi na terytoryi Rastoŭskaj vobłaści, było abvieščana, što jany bolš nie źjaŭlajucca vajskoŭcami, kantrakty ab prachodžańni vajennaj słužby ź imi skasavanyja i ŭ dadzieny momant jany majuć status apałčencaŭ. Taksama im było abvieščana, što na praciahu bližejšych dzion im budzie zahadana vysunucca ŭ napramku h. Maryupala (Ukraina)».
2. Vajskoŭcy pa pryzyvu v/č 45377 (1140-y hvardziejski artyleryjski połk, h. Pskoŭ) paviedamlajuć, što ŭ bližejšy čas ich mohuć adpravić z punkta časovaj dysłakacyi ŭ Rastoŭskaj vobłaści na terytoryju Ukrainy, ź ich uziatyja padpiski pra nievydavańnie».
Staršynia «Sałdackich maci» Eła Palakova adpraviła zapyt jak člen Savieta pa raźvićci hramadzianskaj supolnaści i pravach čałavieka pry Prezidencie RF.
Pamiž savietam i Minabarony isnuje pahadnieńnie ab supracoŭnictvie, što davała nadzieju na źmiastoŭny adkaz.
Adkaz namieśnika kamandujučaha VDV pa pracy z asabistym składam Viktara Kupčyšyna, choć i adpraŭleny 22 vierasia 2014 hoda, padobna, što pryjšoŭ z savieckaha minułaha:
«Padadienaja Vami infarmacyja nie adpaviadaje rečaisnaści. Vašy domysły zasnavanyja na infarmacyi, jakaja prapahandujecca ŭ padkantrolnych «prazachodnie» i varoža nastrojenych u adnosinach da Rasijskaj Fiederacyi kanałach ŚMI. Zachoŭvajcie spakoj i pavažajcie abaroncaŭ našaj Ajčyny».
Ni słova pra toje, što «praviedzienaja pravierka» i što fakty, skažam, nie paćvierdzilisia. Tolki «vichri vraždiebnyje viejut nad nami i łživyje hołosa pojut»!
Sapraŭdy, adzinaje, što zastajecca, — heta rychtavać šapački z falhi (ad apramieńvańnia CRU) i zachoŭvać spakoj.